Las autoritads svizras online

directamain tar il cuntegn

La 3. pitga – la prevenziun privata per la vegliadetgna

Prevenziun per la vegliadetgna: Ultra da la AVS (1. pitga) e da la prevenziun professiunala (2. pitga) datti er la prevenziun privata (3. pitga) che promova il respargn individual a favur da la prevenziun per la vegliadetgna.

En connex cun la prevenziun privata per la vegliadetgna distinguan ins tranter la pitga 3a e la pitga 3b:

  • La pitga 3a – prevenziun individuala liada per persunas cun activitad da gudogn independenta e dependenta:
    Fin ad in tschert import pon questas contribuziuns vegnir deducidas da las entradas ch'èn suttamessas a la taglia. Perquai che questas contribuziuns èn liadas, na pon ins betg disponer da tut temp libramain dad ellas.
  • La pitga 3b – prevenziun individuala libra / nunliada per tuts:
    Questas contribuziuns pon vegnir pajadas en tenor bainplaschair. En cumparegliaziun cun la prevenziun liada vegn la prevenziun individuala libra resguardada main ferm en las taglias

Pajar en a favur da la pitga 3a – import maximal per onn

Tut las persunas cun activitad da gudogn han la pussaivladad da pajar en in tschert import per onn a favur dal conto da la prevenziun 3a tar lur banca u tar lur assicuranza. Quest import po vegnir registrà en la decleraziun da taglia sco deducziun da las entradas ch'èn suttamessas a la taglia. Ins distingua tranter:

  • persunas cun activitad da gudogn independenta, che na fan betg part d'ina instituziun da prevenziun e che pon pia pajar en in import pli grond e
  • persunas emploiadas, che pajan gia contribuziuns ad ina cassa da pensiun.

Ils imports exacts per onn vegnan fixads da l'Uffizi federal d'assicuranzas socialas e communitgads sin sia pagina d'internet. L'onn 2017 dastgan persunas emploiadas che han ina cassa da pensiun pajar en maximalmain 6'768 francs a favur da la pitga 3a. Persunas cun activitad da gudogn independenta che n’han nagina cassa da pensiun, dastgan pajar en l'onn 2017, 20% da las entradas da gudogn annualas, dentant maximalmain 33'840 francs.

L’import annual sto vegnir pajà fin la fin da l’onn correspundent sin il conto da prevenziun. Pensai als dis da festa e faschai Voss pajament ad ura! Infurmaziuns pli exactas As dat Vossa instituziun da prevenziun, Vossa banca u posta.

Persunas pensiunadas che han vinavant in'activitad da gudogn pon pajar en vinavant contribuziuns fin 5 onns suenter avair cuntanschì la vegliadetgna regulara da pensiun. Er en cas d'ina interrupziun transitorica da l'activitad da gudogn (servetsch militar, dischoccupaziun e.u.v.) vala vinavant il dretg da deducziun.

Sin il dabun da prevenziun na sto betg vegnir pajada ina taglia sin la facultad. Ils retgavs dals tschains e dal chapital èn libers da la taglia sin las entradas e da la taglia anticipada.

Retratga (pajar ora) da la 3. pitga

Igl è mo pussaivel da retrair anticipadamain daners or da la pitga 3a per l'acquist e per la construcziun d'atgna proprietad d'abitar, en cas d'ina partenza definitiva da la Svizra, en cas dal cumenzament d'ina activitad da gudogn independenta u en cas da la midada d'ina activitad da gudogn independenta ad in'autra activitad da gudogn independenta.

Ultra da quai èsi pussaivel da retrair daners, en cas d’invaliditad cumplaina. Il dabun ch'è s'accumulà sto vegnir retratg dal tuttafatg al cumenzament da la vegliadetgna da pensiun (il pli baud 5 onns avant fin 5 onns suenter la pensiun). As drizzai a l'instituziun, tar la quala Vus avais la prevenziun privata e dumandai l'autezza dal chapital ch'è vegnì spargnà e las modalitads da la retratga.

Per las contribuziuns da la pitga 3b na valan naginas restricziuns spezialas.

La retratga anticipada da daners or da la 3. pitga vegn suttamessa ad ina taglia annuala per ina tariffa da taglia bainquant pli favuraivla, e quai separadamain da las ulteriuras entradas. Questa pauschala correspunda a l’import da taglia ch’ins pajass en princip per onn sin questas entradas, dentant tenor ina tariffa reducida.