Burgaisas e burgais d’in pajais da la UE/AECL che vivan en Svizra

Tar la cumpra d’ina immobiglia avais Vus ils medems dretgs sco persunas svizras e na duvrais perquai nagina permissiun per cumprar in’abitaziun, ina chasa u terren.

Burgaisas e burgais da terzs stadis che vivan en Svizra

Vus duvrais ina permissiun per cumprar ils suandants bains:

• in alloschi da vacanzas (che po vegnir dà en locaziun temporarmain),

• in’unitad d’abitar en in uschenumnà hotel d’appartaments,

• in’abitaziun secundara (che na po betg vegnir dada en locaziun).

Per cumprar Voss emprim domicil e terren na duvrais Vus nagina permissiun, sche Vus ademplis las suandantas premissas:

• Vus avais ina permissiun da dimora valaivla (per regla ina legitimaziun B),

• Vus vegnis ad abitar en l'abitaziun e na la dais betg en locaziun,

• Vus vulais bajegiar e las lavurs da construcziun pon cumenzar l’onn suenter la cumpra dal terren.

Persunas che possedan ina permissiun da domicil

Sche Vus avais ina permissiun da domicil (legitimaziun C), avais Vus – tar la cumpra d’ina immobiglia – ils medems dretgs sco persunas svizras e na duvrais damai nagina permissiun per cumprar in’abitaziun, ina chasa u terren.

Cunfinarias e cunfinaris

Burgaisas e burgais da pajais da l’UE/AECL che lavuran sco cunfinarias e cunfinaris en Svizra (permissiun da cunfinarias e cunfinaris, legitimaziun G), dastgan cumprar senza permissiun in’abitaziun secundara en la regiun da lur lieu da lavur, na dastgan dentant betg dar en locaziun quella durant il temp ch’els lavuran en la regiun sco cunfinaria u cunfinari.

Burgaisas e burgais da terzs pajais

Burgaisas e burgais da terzs pajais, danor cunfinarias e cunfinaris, dovran ina permissiun per cumprar ina immobiglia.

Sche Vus duvrais ina permissiun da cumpra u sche Vus na pudais betg excluder quai d’emprim ennà, stuais Vus As drizzar a l’autoritad chantunala cumpetenta al lieu nua che l’immobiglia sa chatta.

Ina glista da las autoritads chantunalas cumpetentas chattais Vus a la fin dal fegl d’infurmaziun da l’Uffizi federal da giustia. Vus pudais chargiar giu il fegl da la pagina Cumpra da terren tras persunas a l’exteriur.

L’autoritad chantunala prenda ina decisiun. Cunter quella pudais Vus far recurs.

Las premissas per survegnir ina permissiun dependan dal chantun e dal gener da l’immobiglia. La permissiun vegn concedida per in tschert intent d’utilisaziun; l’immobiglia na dastga betg vegnir utilisada per in auter intent.

Sch’i n’è vegnì fixà nagut auter, vala la permissiun da cumpra trais onns.

Il dumber d’abitaziuns da vacanzas e d’unitads d’abitar en uschenumnads hotels d’appartaments che dastgan vegnir vendidas en Svizra a persunas estras, è suttamess ad ina limita maximala naziunala (actualmain 1500 ad onn); il dumber da questas abitaziuns vegn repartì sin ils chantuns.

En tscherts chantuns sco Genevra u Turitg èsi scumandà dal tut da vender abitaziuns da vacanzas a persunas estras. La glista cun ils contingents da permissiun actuals chattais Vus en l’agiunta da l’Ordinaziun davart l’acquist da bains immobigliars tras persunas da l’exteriur.

Sche Vus abitais a l’exteriur, pudais Vus cumprar in’abitaziun secundara mo en in lieu, cun il qual Vus avais ina colliaziun extraordinariamain stretga e degna da vegnir protegida. En la pratica vegn questa pretensiun giuridica interpretada tut tenor chantun da maniera pli u main stricta.

En mintga cas stuais Vus ademplir las suandantas premissas:

• L’abitaziun sto esser en in lieu turistic.

• La surfatscha d’abitar netta na dastga betg surpassar 200 m2 e la surfatscha dal terren da construcziun dastga importar maximalmain 1000 m2.

• In’abitaziun da vacanzas na dastga betg vegnir dada en locaziun durant tut l’onn, mabain mo temporarmain; abitaziuns secundaras na dastgan insumma betg vegnir dadas en locaziun.

• Vus na dastgais betg posseder dapli che ina abitaziun da vacanzas u abitaziun secundara en Svizra.

Sco per persunas svizras vala er per persunas estras la regla ch’ina abitaziun secundara na dastga betg vegnir construida en ina vischnanca cun ina quota d’abitaziuns secundaras da passa 20 pertschient.

Persunas estras che vulan cumprar immobiglias per l’utilisaziun commerziala u industriala (danor immobiglias che servan a la construcziun d’edifizis, al commerzi cun immobiglias ed a la locaziun d’immobiglias) na dovran betg ina permissiun da cumpra.

Sin la pagina Cumpra da terren tras persunas a l’exteriur metta l’Uffizi federal da giustia a disposiziun in fegl d’infurmaziun.

La glista cun ils contingents da permissiun actuals repartids tenor chantuns chattais Vus en l’agiunta da l’Ordinaziun davart l’acquist da bains immobigliars tras persunas da l’exteriur