La natiralisaziun è l’ultim pass sin la via a l’integraziun en Svizra. A la persuna natiralisada dat la natiralisaziun il dretg da votar, d’eleger sco er da vegnir elegida u elegì.
La Svizra enconuscha il dretg da burgais dubel. Tgi che dumonda la naziunalitad svizra na ristga pia betg da perder la naziunalitad d’enfin ussa – nun ch’il stadi da derivanza n’acceptia betg il dretg da burgais dubel.
I existan la procedura da natiralisaziun ordinaria e la procedura da natiralisaziun facilitada. L’ultima è surtut fatga per persunas cun commembers da famiglia svizzers.
Tgi po far ina dumonda?
Possessuras e possessurs d’ina permissiun da domicil (legitimaziun C).
Persunas che vivan cun ina Svizra u in Svizzer en in partenadi registrà.
A partir da cura?
Il dretg federal pretenda in domicil d'almain 10 onns en Svizra. 3 da quests onns ston esser durant ils ultims 5 onns avant l'inoltraziun da la dumonda.
Il temp, durant il qual insatgi ha vivì en la vegliadetgna dad 8 fin 18 onns en Svizra, quinta dubel. Ina dumonda da natiralisaziun na po dentant betg vegnir inoltrada senza ina dimora effectiva d’almain 6 onns en Svizra.
Tut tenor chantun vegni er pretendì, che Vus stoppias esser domicilià per almain 2 fin 5 onns en la vischnanca u en il chantun, nua che Vus vulais vegnir natiralisada u natiralisà, avant che Vus inoltrais la dumonda da natiralisaziun.
Sut tge premissas?
La Lescha federala davart il dretg da burgais svizzer prevesa ch’il dretg da burgais vegnia mo concedì a persunas,
ch’èn integradas cun success
ch’èn famigliaras cun las cundiziuns da viver svizras
che na pericliteschan betg la segirtad da la Svizra interna ed externa.
Ulteriuras infurmaziuns davart la natiralisaziun ordinaria chattais Vus sin la pagina dal Secretariat da stadi per migraziun.
Las premissas per survegnir il dretg da burgais dal chantun e da la vischnanca varieschan fitg tut tenor chantun e vischnanca.
Tge custa la natiralisaziun ordinaria?
La taxa per la natiralisaziun ordinaria variescha considerablamain tut tenor vischnanca e tut tenor chantun. En media sa cumponan ils custs sco suandant:
vischnanca: tranter 500 e 1000 francs per persuna
chantun: fin 2000 francs per persuna
Confederaziun:
pèr cun u senza uffants minorens: 150 francs
persuna singula cun u senza uffants minorens: 100 francs
persuna singula minorenna: 50 francs
Supplementarmain pon resultar custs per ils documents pretendids (conferma da dimora, extract dal register penal, extract dal register da scussiun e.u.v.)
Co ston ins proceder?
Inoltrai la dumonda da natiralisaziun tar Voss chantun da domicil u tar Vossa vischnanca da domicil. Consultai la pagina d’internet da Voss chantun u da Vossa vischnanca per vegnir a savair tar tge autoritad che Vus pudais survegnir il formular da dumonda.
Sche Vus avais inoltrà ina dumonda, vegnis Vus envidada u envidà ad in discurs persunal, nua che Vus vegnis infurmada u infurmà davart ils ulteriurs pass.
Tut tenor chantun e tut tenor vischnanca variescha la procedura fitg. En mintga cas stuais Vus dentant pudair cumprovar che Vus hajas enconuschientschas suffizientas d'ina da las linguas naziunalas.
I dat autoritads da natiralisaziun che fan cun Vus in test en scrit u a bucca per examinar Vossas enconuschientschas davart la Svizra. Qua chattais Vus in exempel dal chantun Vad e qua in exempel dal chantun Berna.
Quant ditg dura la procedura da natiralisaziun ordinaria?
La durada d’ina procedura da natiralisaziun po variar. Tar l’autoritad chantunala u tar Vossa vischnanca vegnis Vus a savair dapli.
Tgi po far ina dumonda?
il conjugal u la conjugala d’ina Svizra u d’in Svizzer
l’uffant d’ina Svizra u d’in Svizzer
fin ils 15 da favrer 2023: ina persuna sut 40 onns d'ina famiglia estra che viva en la terza generaziun en Svizra; suenter ils 15 da favrer 2023 vegn la limita da vegliadetgna sbassada a 25 onns.
in uffant minoren e senza naziunalitad
ina persuna che ha pers sia naziunalitad svizra (p.ex. tras il matrimoni cun ina persuna estra).
A partir da cura pon ins far ina dumonda?
Per che Vus possias far ina dumonda per ina natiralisaziun facilitada, na stuais Vus betg avair vivì uschè ditg en Svizra sco per ina natiralisaziun ordinaria. La durada da dimora en Svizra, che vegn pretendida per la natiralisaziun facilitada, sa differenziescha da cas a cas.
Premissas
Las premissas per ina natiralisaziun facilitada èn principalmain las medemas sco per la natiralisaziun ordinaria. Latiers vegnan premissas supplementaras che pon dentant sa differenziar tut tenor cas. Dapli vegnis Vus a savair sin la pagina d’internet Co davent jau Svizra u Svizzer dal Secretariat da stadi per migraziun.
Tge custa ina natiralisaziun facilitada?
La taxa per ina natiralisaziun facilitada variescha tut tenor vegliadetgna:
250 francs per persunas minorennas sut 12 onns
650 francs per persunas minorennas a partir da 12 onns
900 francs per persunas creschidas.
La summa totala sto vegnir pajada ordavant e na vegn betg restituida, sche la dumonda vegn refusada.
Co ston ins proceder?
La dumonda per ina natiralisaziun facilitada sto vegnir inoltrada cun il formular uffizial tar il Secretariat da stadi per migraziun. Vus pudais dumandar il formular per e-mail; là stuais Vus inditgar l’adressa postala exacta, nua ch’il formular duai vegnir tramess.
A la dumonda ston vegnir agiuntads tscherts documents. Tut tenor cas èn quai differents documents. Ulteriuras infurmaziuns chattais Vus sin la pagina Co davent jau Svizra u Svizzer dal Secretariat da stadi per migraziun.
Quant ditg dura ina procedura da natiralisaziun facilitada?
Ina procedura da natiralisaziun facilitada dura en media in onn e mez.
Dumondas frequentas (FAQ) davart il dretg da burgais svizzer dal Secretariat da stadi per migraziun.