En Svizra pudais Vus far ina dumonda d’asil, sche Vus vegnis persequitada u persequità en Voss pajais d’origin (u en il pajais che Vus avais vivì sco ultim) pervia da Vossa razza, Vossa religiun, Vossa naziunalitad, Vossa persvasiun politica u Vossa appartegnientscha ad ina tscherta gruppa sociala u sche Vus temais per Vossa libertad.
Ina dumonda d’asil po vegnir fatga a bucca u en scrit tar in post da cunfin avert, tar la controlla da cunfin dad in eroport svizzer u en in center federal d’asil dal Secretariat da stadi per migraziun.
I n’è betg pussaivel da far ina dumonda d’asil per la Svizra a l’exteriur. Vus pudais dentant dumandar in visum umanitar tar ina represchentanza svizra a l’exteriur per che Vus possias vegnir en Svizra. Quai è però mo pussaivel, sche Vossa vita u Vossa integritad corporala è periclitada directamain, seriusamain e concretamain.
Ina crisa u eveniments guerrils en Voss pajais na tanschan betg. Las schanzas da retschaiver in visum umanitar èn pitschnas.
Per ina dumonda d’asil na datti naginas pretensiuns legalas e formalas. La persuna che dumonda asil sto declerar ils motivs da sia fugia e sche pussaivel preschentar cumprovas, per ch’ella vegnia renconuschida sco fugitiva u fugitiv.
Dumonda d’asil en plirs pajais
La Svizra ha suttascrit la Cunvegna da Dublin. Quella vul impedir ch’ina persuna fetschia ina dumonda d’asil en plirs stadis da la UE/AECL. Tenor questa cunvegna è mintgamai mo in stadi responsabel per ina persuna che dumonda asil. Sche Vus avais gia fatg ina dumonda d’asil en in auter stadi dal spazi da Dublin, vegnis Vus per regla tramessa u tramess enavos en quest stadi.
(*AECL: Islanda, Liechtenstein, Norvegia, Svizra)
Privel per la segirezza
Requirentas e requirents d’asil che han commess delicts u che pericliteschan la segirezza da la Svizra na survegnan betg asil en Svizra. La dumonda d’asil da questas persunas vegn refusada ed ellas ston bandunar la Svizra, nun che tscherts motivs s’opponian a quai.
Il Secretariat da stadi per migraziun descriva sin sia pagina d’internet en moda detagliada e cun maletgs la procedura d’asil e declera, tge premissas che ston esser accumplidas per ch’il status sco fugitiva u fugitiv vegnia renconuschì.
Vus pudais er consultar sia pagina d’internet (en dudesch linguas) che sa drizza spezialmain a requirentas e requirents d’asil e che dat infurmaziuns davart la procedura d’asil, davart la vita en il center federal d’asil e davart la vita en Svizra.
Sche vus n’essas betg d’accord cun la decisiun d’asil, pudais Vus far recurs.
En la gronda part dals cas ha l’entira procedura d’asil lieu en in center federal d’asil, nua che las requirentas ed ils requirents d’asil abiteschan er:
Pagina d’internet (en dudesch linguas) che sa drizza spezialmain a requirentas e requirents d’asil