Las autoritads svizras online

directamain tar il cuntegn

Persuna sparida

Annunzia da spariziun

Sche Vus annunziais a la polizia ch'ina persuna è sparida, fa la polizia en mintga cas ina publicaziun uffiziala poliziala. In'uschenumnada tschertga publica vegn però fatga mo:

  • tar uffants e tar persunas minorennas,
  • en cas ch'i vegn suspectà in crim,
  • en cas ch'i vegn suspectà in accident,
  • en cas d'in privel da suicidi u da problems psichics,
  • sche la persuna sparida dovra medicaments u è malsauna resp. mendusa.

Sch'ina tschertga publica vegn fatga, decida il corp da polizia responsabel.

In'annunzia da spariziun pudais Vus far tar mintga post da polizia al spurtegl u per telefon sur il numer d'urgenza 117.

Far in'annunzia da spariziun

Alarm per SMS en cas d'in rapiment d'in uffant

Cun in sistem d'alarm spezial po la polizia tschertgar persunas minorennas sparidas via radio u televisiun, via tavlas d'infurmaziun a las autostradas sco er tras communicaziuns a las staziuns u als eroports. Per integrar anc meglier la populaziun en la tschertga, vegnan las annunzias d'alarm er transmessas per SMS. Tgi ch'è interessà po sa registrar tar quest servetsch. Ulteriuras infurmaziuns survegnis Vus sin la pagina d'internet.

Persuna sparida a l'exteriur

Sch'ina persuna è sparida a l'exteriur, As drizzai per plaschair al proxim post da polizia u telefonai al numer d'urgenza 117.

Rapiment internaziunal d'uffants

En cas d'in rapiment d'in uffant a l'exteriur As gida l'uschenumnada Autoritad centrala per il tractament da rapiments internaziunals d'uffants (Uffizi federal da giustia). Ensemen cun las autoritads partenarias da l'exteriur s'engascha ella per in repatriament dals uffants rapinads. Ulteriuras infurmaziuns survegnis Vus sin la pagina d'internet.