Las autoritads svizras online

directamain tar il cuntegn

Permiss da manischar internaziunal

Tgi dovra in permiss da manischar internaziunal, en tge pajais vegn el pretendì e tge ston ins far per empustar in tal?

Il permiss da manischar internaziunal vala 3 onns (sch'il permiss da manischar da l'exteriur na vala betg uschè ditg, na dastga il permiss da manischar internaziunal betg durar pli ditg ch'il permiss da manischar da l'exteriur) e na po betg vegnir prolungà. Ils custs varieschan da chantun a chantun.

Dovri in permiss da manischar internaziunal a l'exteriur?

La gronda part dals pajais europeics acceptan il permiss da manischar svizzer en il format da carta da credit (PCC). Sche Vus avessas anc da posseder in vegl permiss da manischar blau, po quel vegnir barattà tut simplamain tar Voss Uffizi per il traffic sin via – vesair.

Per pajais ordaifer l'Europa èsi recumandabel d'avair cun sai il permiss da manischar internaziunal. I dat tscherts pajais, sco l'Albania, la Russia, l'Ucraina e la Bielorussia, nua che quai vegn schizunt recumandà urgentamain. En auters pajais èsi obligatoric d'avair in permiss da manischar internaziunal. Ultra da quai pretendan blers locaturs d'autos il permiss da manischar internaziunal.

As infurmai en mintga cas avant che partir per Voss viadi a l'exteriur en Voss biro da viadi u tar il consulat responsabel, tge documents da viadi che Vus duvrais per il stadi respectiv.

Permiss da manischar internaziunal – empustar

Per ch'il permiss da manischar internaziunal possia vegnir emess al spurtegl da Voss Uffizi per il traffic sin via da Voss lieu da domicil duvrais Vus il suandant:

  • ina fotografia da passaport
  • il permiss da manischar svizzer en format da carta da credit (FAK)

Vus pudais er dumandar il permiss da manischar internaziunal per posta. Tramettai en quest cas ina fotografia da passaport ed ina copia dal permiss da manischar svizzer (vart davant e vart davos) cun ina nota che Vus giavischais d’empustar il permiss da manischar internaziunal a Voss Uffizi per il traffic sin via.

Il permiss da manischar internaziunal vala 3 onns e na po betg vegnir prolungà.

Custs e valaivladad

Il permiss da manischar internaziunal vala 3 onns (sch'il permiss da manischar da l'exteriur na vala betg uschè ditg, na dastga il permiss da manischar internaziunal betg durar pli ditg ch'il permiss da manischar da l'exteriur) e na po betg vegnir prolungà. Ils custs varieschan da chantun a chantun.

Ir cun auto en Svizra sco persuna estra

Persunas che abitan a l'exteriur na dastgan betg manischar da professiun vehichels a motor en Svizra durant 1 onn, sch'ellas han cuntanschì la vegliadetgna minimala pretendida (p.ex. auto da persunas: 18 onns) e sch'ellas possedan in permiss da manischar naziunal valaivel.  Sche las categorias dals vehichels a motor che dastgan vegnir guidads na figureschan betg en scrittira latina sin il permiss da manischar da l'exteriur, ston ellas ultra da quai posseder in permiss da manischar internaziunal.

Sche Vus abitais dapli che 12 mais en Svizra, stuais Vus barattar Voss permiss da manischar cunter in permiss da manischar svizzer tar l'Uffizi per il traffic sin via da Voss chantun da domicil. Quest barat stuess vegnir dumandà avant ch'ils 12 mais èn scadids.

Laschar midar in permiss da manischar da l'exteriur