Las autoritads svizras online

directamain tar il cuntegn

Dumandar il permiss per emprender a manischar

Il 18. anniversari s'avischina e Vus pudais bainbaud cumenzar ad emprender ad ir cun auto. Fin ch'il permiss per emprender a manischar è però arrivà en Vossa chascha da brevs, ston ins evader differentas chaussas.

Pass 1: Curs per agid d'urgenza

Absolvai in curs per agid d'urgenza. L'attest dal curs per agid d'urgenza vala 6 onns.

La dumonda per in permiss per emprender a manischar po vegnir inoltrada a l'autoritad cumpetenta per regla il pli baud 1 mais avant il 18. Anniversari. As infurmai per plaschair tar l'uffizi per il traffic sin via da Voss chantun da domicil.

Pass 2: Dumonda

Vus emplenis il formular da dumonda (incl. examen da la vesida) per il permiss per emprender a manischar. Quel po per regla vegnir chargià giu da la pagina d'internet da l'uffizi per il traffic sin via da Voss chantun da domicil u Vus al survegnis directamain tar l'uffizi per il traffic sin via u en bleras vischnancas er directamain tar la controlla d'abitants. As infurmai, avant che Vus passais persunalmain tar la controlla d'abitants.

Il formular da dumonda emplenì (incl. examen da la vesida), in examen da la vesida valaivel, ina fotografia da passaport en colur surdais Vus a l'uffizi per il traffic sin via u a Vossa controlla d'abitants ensemen cun l'attest dal curs d'agid d'urgenza, cun la carta d'identitad svizra u cun la legitimaziun da persunas estras.
N'emblidai betg ch'ils documents ston vegnir preschentads en l'original.

Dumandar il permiss per emprender a manischar

Pass 3: Examen da teoria

Las autoritads conferman Vossa dumonda. Vus As pudais ussa annunziar per l'examen da teoria – il pli simpel sur l'internet.

En ils chantuns Berna, Glaruna, Soloturn, Son Gagl, Neuchâtel e Turitg pudais Vus far l’examen da teoria er per englais. Per ulteriuras infurmaziuns contactai p.pl directamain ils uffizis per il traffic sin via chantunals!

Pass 4: Permiss per emprender a manischar

Vus avais fatg cun success l'examen da teoria – gratulaziun! Vus survegnis Voss permiss per emprender a manischar.

Quant ditg vala il permiss per emprender a manischar?

Il permiss per emprender a manischar vala 24 mais e na po betg vegnir prolungà.

Tge dretgs avais Vus cun il permiss per emprender a manischar?

Cun il permiss per emprender a manischar pudais Vus ir cun auto en accumpagnament d'ina persuna che posseda il permiss da manischar dapi almain 3 onns, ha cumplenì il 23 onns e posseda il permiss definitiv.