La renta da la AVS a la vegliadetgna dal pensiunament ordinari
La 1. pitga As garantescha in’entrada che tanscha per cuvrir ils basegns elementars durant il temp suenter il pensiunament.
Per ina persuna singula importa la renta minimala da vegliadetgna actualmain 1195 francs; la renta maximala importa 2390 francs.
L’autezza da la renta dependa tranter auter dals suandants facturs:
Dal dumber dad onns che Vus avais pajà contribuziuns a la AVS: Sche Vus avais adina pajà Vossas contribuziuns a la AVS, pudais Vus pretender ina renta entira. Sche Vus avais mancanzas da contribuziun, survegnis Vus mo ina renta parziala. Sche Vus n'avais per exempel pajà naginas contribuziuns a la AVS durant in entir onn, vegn Vossa renta ad esser per var 2,3 pertschient pli bassa.
Da Vossas entradas annualas en media: Pli auta che Vossa paja è, e pli autas èn las contribuziuns che Vus stuais pajar a la AVS. Per consequenza vegn er Vossa renta ad esser pli auta. Per survegnir pli tard ina renta maximala, stuais Vus gudagnar en media almain 86 040 francs per onn.
Resguardai per plaschair: Sche Vus essas maridada u maridà u vivais en in partenadi registrà, importa Vossa renta maximalmain 150 pertschient d'ina renta maximala per ina persuna singula. Sche Vossas duas rentas ensemen surpassan quest summa maximala (actualmain 3585 francs), vegn Vossa renta reducida per l'import correspundent.
La renta da la AVS en cas d'in pensiunament anticipà u spustà
La vegliadetgna da renta ordinaria en Svizra è 64 onns per las dunnas e 65 onns per ils umens. Vus pudais dentant er As laschar pensiunar in u dus onns pli baud. En quest cas survegnis Vus ina renta reducida.
Sche Vus retirais la renta in onn ordavant, vegn Vossa renta reducida per il rest da Vossa vita per 6,8 pertschient. Sche Vus retirais Vossa renta dus onns ordavant, importa la reducziun 13,6 pertschient.
Sche Vus decidais da spustar Voss pensiunament per in fin maximalmain tschintg onns, vegn la renta mensila auzada cun in supplement. L’autezza dependa da la durada dal spustament dal pensiunament.
Valitaziun da la renta da la AVS
Vus pudais pretender da tut temp ina valitaziun da la renta che Vus avais dabun il mument dal pensiunament.
Resguardai per plaschair: Questa valitaziun è mo ina valur directiva, cunquai che la calculaziun sa basa sin las disposiziuns valaivlas tenor la lescha e sin Vossa situaziun professiunala actuala.
Empustar ina valitaziun da la renta futura online – assicuranzas socialas
Prestaziuns supplementaras
Sch’i n’è betg pussaivel da finanziar Voss custs da basa minimals cun la renta da la AVS che Vus retschavais, prevesa la 1. pitga prestaziuns supplementaras.
Ils meds d’agid d'ina renta da la AVS
Sche Vus retschavais ina renta da la AVS, pudais Vus pretender meds d’agid da la AVS, per exempel channas, egliers, protesas u er ascensurs.
La renta da la LPP al mument da la vegliadetgna da renta ordinaria
La renta da la 2. pitga vegn calculada sin basa da las contribuziuns che Vus avais pajà durant Vossa vita professiunala sco er tenor il reglament da la cassa da pensiun che administrescha Voss daners.
Cura che Vus cuntanschais la vegliadetgna da pensiun, As vegn l'import che Vus avais spargnà, per ordinari pajà en furma d'ina renta da vegliadetgna mensila.
Vus pudais er As laschar pajar ora in quart da la summa da Vossa 2. pitga sco retratga da chapital (unica) e retrair il rest sco renta mensila. Las singulas cassas da pensiun pussibiliteschan da retrair dapli chapital u da retrair tut il chapital empè d'ina renta.
La renta da vegliadetgna vegn calculada sin basa da l'uschenumnada tariffa da conversiun: il chapital che Vus avais spargnà en la 2. pitga, vegn midà en ina renta che vegn pajada per il rest da Vossa vita. Actualmain prescriva la lescha ina tariffa da conversiun minimala da 6,8 pertschient.
Exempel
Sche Vus avais spargnà in dabun da vegliadetgna da 200 000 francs e sche la tariffa da conversiun da la LPP importa 6,8 pertschient, survegnis Vus 13 600 francs per onn u 1133 francs per mais.
L’autezza dal chapital che Vus avais spargnà en la 2. pitga sco er las modalitads per retrair il chapital e la renta futura, vegnis Vus a savair da Vossa instituziun da provediment.
La renta da la LPP en cas d'in pensiunament anticipà u spustà
Sch’il reglament da Vossa cassa da pensiun prevesa quai, pudais Vus retrair Vossa 2. pitga ordavant (il pli baud cun 58 onns) u spustar la retratga (sin il pli fin 70 onns).
En cas d'ina renta anticipada è Vossa renta pli bassa. En cas d'ina retratga spustada vegn percunter augmentada la tariffa da conversiun per Vossa renta – per consequenza survegnis Vus er ina renta pli auta.
La renta che Vus retschavais in di, vegnis Vus a savair da Vossa instituziun da provediment.
Cun contribuziuns voluntaras a la 3. pitga engrondis Vus Voss dabun da vegliadetgna.
En general pudais Vus retrair Vossa 3. pitga mo cumplainamain sco pajament unic (il pli baud tschintg onns avant la vegliadetgna da renta ordinaria e fin tschintg onns suenter la vegliadetgna da renta ordinaria, premess che Vus possias cumprovar che Vus lavurais vinavant).
As drizzai a l'instituziun, a la quala Vus avais pajà las contribuziuns, per vegnir a savair l’autezza dal chapital spargnà, las pussaivladads d’ina retratga u l’autezza dal pajament en cas d'in pensiunament anticipà u spustà.
Vossas rentas dal mais totalas (AVS, LPP e provediment privat) stuais Vus declerar a l’autoritad fiscala: En general vegnan las entradas totalas suttamessas a la taglia.
Sin las prestaziuns da chapital da la 2. e 3. pitga (q.v.d. sin ils daners che Vus avais survegnì sco pajament unic) stuais Vus pajar taglia sin basa d'ina calculaziun speziala (tariffa da taglia speziala).
Sin las prestaziuns supplementaras tar la AVS e tar la AI na stuais Vus percunter pajar nagina taglia.
Attests da taglia per las rentas da vegliadetgna
La fin da l’onn tramettan ils posts responsabels mintgamai automaticamain ils attests da taglia per Vossa renta da la AVS sco er per las rentas da la 2. e 3. pitga. Uschia avais Vus avunda temp per emplenir la decleraziun da taglia.
Vus pudais empustar in attest da taglia tar Vossa cassa da cumpensaziun da la AVS u da tut temp durant l’onn tar Vossa instituziun da provediment professiunal.
Per infurmaziuns davart Vossa renta da la AVS persunala As drizzai a Vossa cassa da cumpensaziun da la AVS.
Sin la pagina d’internet da las assicuranzas socialas chattais Vus infurmaziuns detagliadas davart la vegliadetgna da renta flexibla e davart las consequenzas finanzialas d'in pensiunament anticipà u spustà.
La broschura «Prestaziuns supplementaras» cuntegna tut las infurmaziuns necessarias davart quest tema.
Sin la pagina d’internet da las assicuranzas socialas chattais Vus infurmaziuns specificas davart ils meds d’agid d'ina renta da la AVS e da la AI.
Sin la pagina Rentas da la AVS per persunas che vivan suenter il pensiunament a l’exteriur chattais Vus infurmaziuns detagliadas davart quest tema.
L'autoritad fiscala da Voss chantun As po dar infurmaziuns specificas davart l’imposiziun da taglia e davart il chapital dal provediment da vegliadetgna.