Svizras e Svizzers sco er burgaisas e burgais d’in stadi da la UE/AECL han il dretg da retrair lur renta svizra da la AVS a l’exteriur. La renta vegn per regla pajada en la valuta dal pajais correspundent. Nua e co che Vus faschais la dumonda, dependa da la data da Vossa partenza.
Vus bandunais la Svizra suenter Voss pensiunament
Sche Vus retirais gia ina renta da la AVS en Svizra, alura communitgai Vossa partenza a la cassa da cumpensaziun da la AVS ch’è responsabla per Vus. Quella surdat Vossas actas a la Cassa svizra da cumpensaziun a Genevra. Uschespert che Vus abitais a l’exteriur, è quest post responsabel per Vus e Vus survegnis Vossa renta da là.
Sche Vus avais er retratg er prestaziuns supplementaras a la AVS u indemnisaziuns a persunas dependentas d’agid, perdais Vus il dretg da quellas, cura che Vus partis per l’exteriur.
Vus abitais gia a l’exteriur il mument dal pensiunament
Sche Vus avais cumplenì la vegliadetgna da pensiun che vala en Svizra, pudais Vus dumandar che Vossa renta svizra da la AVS vegnia pajada a l’exteriur. La Cassa svizra da cumpensaziun a Genevra As infurmescha davart la procedura ed As inditgescha a tge post da coordinaziun a l’exteriur che Vus As pudais drizzar.
Sch’igl exista ina cunvegna d’assicuranzas socialas cun Voss stadi d'origin, vegn Vossa renta svizra da la AVS er pajada a l’exteriur. Sch’ina tala cunvegna n'exista betg, perdais Vus Voss dretg da la renta svizra da la AVS, sche Vus As domiciliais definitivamain a l’exteriur.
Stadis cun cunvegna d’assicuranzas socialas
Cun ils suandants stadis datti cunvegnas d’assicuranzas socialas: Australia, Bosnia-Erzegovina, Brasilia, Canada, Chile, Cosovo, Filippinas, Giapun, Israel, Macedonia dal Nord, Montenegro, Québec, San Marino, Serbia, Stadis Unids da l’America, Tirchia ed Uruguay. Burgaisas e burgais da quests stadis che vulan retrair lur renta da la AVS a l’exteriur, sa drizzan a la Cassa svizra da cumpensaziun a Genevra. Quella As infurmescha davart il contact cun las autoritads correspundentas e davart la procedura da pajament a l’exteriur.
Nagin dretg da la renta a l’exteriur – dumandar in rembursament
Cun Voss pajais d’origin na datti nagina cunvegna d’assicuranzas socialas che prevesa l’export da rentas. En quest cas pudais Vus survegnir enavos mo las contribuziuns che Vus e Voss patrun avais pajà a la AVS. Faschai ina dumonda per in rembursament senza tschains. Il formular e las infurmaziuns necessarias survegnis Vus tar la Cassa svizra da cumpensaziun a Genevra.
Sche Vus avais gia retratg rentas en Svizra, vegnan quellas deducidas tar il rembursament.
Provediment professiunal
Las prestaziuns da Voss provediment professiunal (2. pitga) pudais Vus retrair a l’exteriur. As drizzai a Vossa instituziun da provediment (cassa da pensiun). Quella As infurmescha davart las mesiras necessarias.
Provediment privat
Sche Vus avais paja contribuziuns ad ina terza pitga, na dependi betg nua che Vus abitais suenter Voss pensiunament. As drizzai a l’instituziun da Vossa terza pitga. Quella As infurmescha davart las modalitads da la retratga da chapital.
Infurmaziuns e formulars dal Post da cumpensaziun central/Cassa svizra da cumpensaziun: dumandar ina renta, calculaziun provisorica, procedura da pajament e.u.v.
Mussavia dal Departament federal d'affars exteriurs «Pensiun a l’exteriur»