Las autoritads svizras online

directamain tar il cuntegn

Pensiun a l'exteriur

Tscherts burgais svizzers decidan da viver sco persunas pensiunadas a l'exteriur. Da l'autra vart vulan blers migrants ch'eran vegnids en Svizra per lavurar returnar en lur pajais d'origin cur ch'els èn pensiunads.

Renta da la AVS

Vus essas burgais svizzer, d'in stadi commember da la UE u da la AECL

Abstrahà da paucas excepziuns avais Vus il dretg da retrair Vossa renta da la AVS a l'exteriur. Avant Vossa partenza da la Svizra stuais Vus infurmar Vossa cassa da cumpensaziun (cf. link). Quella surdat Voss dossier a la Cassa svizra da cumpensaziun a Genevra. Retschaviders da la AVS pon tscherner libramain, sch'els vulan far trametter lur renta ad in'adressa da pajament en Svizra u a l'exteriur. Las prestaziuns da la AVS vegnan pajadas normalmain a la valuta naziunala da l'adressa da pajament.

In eventual dretg d'ina indemnisaziun a persunas dependentas d'agid u da prestaziuns supplementaras perdais Vus, sche Vus As domiciliais a l'exteriur. Questas prestaziuns vegnan concedidas mo a persunas ch'èn domiciliadas en Svizra.

Dapi l'entrada en vigur dals contracts bilaterals na pon Svizzers pensiunads ch'èn domiciliads en in stadi commember da la UE betg pli s'assicurar facultativamain tar l’AVS; perquai survegnan els mo ina renta parziala. In onn da contribuziun mancant correspunda ad ina reducziun da la renta da circa 2,3 pertschient.

Dapli infurmaziuns chattais Vus sin il fegl d'infurmaziun «Ausreise ins Ausland» (cf. link).

Annunziar la partenza da la Svizra: Tar tge cassa da cumpensaziun stoss jau m'annunziar?

Modalitads da la partenza per l'exteriur cur ch'ins è pensiunà:

Vus essas burgais d'in auter pajais

Sche Vus essas burgais d'in pajais, cun il qual la Svizra ha concludì ina cunvegna d'assicuranza sociala (Australia, San Marino, Canada, Israel, Giapun, Tirchia, Chile, Macedonia, USA, Filippinas, Bosnia-Erzegovina, Serbia e Montenegro, Uruguay), avais Vus il dretg da retrair Vossa renta da la AVS a l'exteriur.

Sche Vus essas burgais d'in pajais, cun il qual la Svizra n'ha betg concludì ina cunvegna d'assicuranza sociala, perdais Vus Voss dretg d'ina renta uschespert che Vus partis da la Svizra ed As domiciliais a l'exteriur. Suenter Vossa partenza da la Svizra avais Vus – sut tschertas circumstanzas – il dretg d'ina restituziun da las contribuziuns da la AVS senza tschains (cf. link).

As infurmai per plaschair en la broschura inditgada qua sutvart davart Voss dretgs e davart las mesiras che Vus stuais prender da cas a cas.

Broschura "Sozialversicherungen: Aufenthalt in der Schweiz und Ausreise. Informationen für ausländische Staatsangehörige"

Restituziun da las contribuziuns

Prevenziun professiunala

Las prestaziuns da Vossa prevenziun professiunala (2. pitga / LPP) pudais Vus retrair a l'exteriur. As drizzai a Vossa instituziun da prevenziun che As infurmescha davart las mesiras necessarias, e la communitgai Vossa nova adressa. En cas da basegn po Voss patrun As far las indicaziuns necessarias per quest intent.

Prevenziun privata (3. pitga)

Sche Vus avais pajà daners en ina terza pitga, na gioghi nagina rolla, nua che Vus abitais suenter Voss pensiunament. As drizzai a l'instituziun da Vossa terza pitga che As infurmescha davart las modalitads da la retratga da chapital.