Las autoritads svizras online

directamain tar il cuntegn

Numers d'immatriculaziun e possessurs

Sche Vus vulais chattar ora, tgi che posseda in tschert numer d'immatriculaziun, As stuais Vus drizzar a l'uffizi per il traffic sin via dal chantun, dal qual il numer deriva.

Vus survegnis l'infurmaziun davart mintga numer d'immatriculaziun (num ed adressa dal possessur) che sa chatta en il traffic sin via. Numers d'immatriculaziun ch'èn depositads, scrudads u sur dals quals i na vegnan dadas naginas infurmaziuns èn exclus da quai. Blers chantuns enconuschan l'index dals autos en furma d'in cudesch, tschertins porschan in servetsch d'infurmaziun per sms ed auters publitgeschan ils numers dals autos cun las datas respectivas en l'internet.

Infurmaziuns davart il possessur

Scumond da dar infurmaziuns

Sche Vus vulais evitar che las datas da Vus sco possessur vegnian dadas vinavant a persunas privatas ed ad organisaziuns, stuais Vus far quai cun ina communicaziun en scrit a l'uffizi per il traffic sin via. Tscherts chantuns porschan per quai in servetsch online u formulars che pon vegnir telechargiads da l’internet. As infurmai tar l'uffizi per il traffic sin via da Voss chantun da domicil.

Infurmaziuns davart datas dal possessur bloccadas survegnis Vus mo, sche Vus pudais cumprovar en scrit che la bloccada As impedescha da far valair dretgs envers la persuna pertutgada.