Las autoritads svizras online

directamain tar il cuntegn

Midar la cassa da malsauns - cura e co?

Las premias per las cassas da malsauns pon midar mintga onn. Ellas vegnan communitgadas mintgamai l'atun suenter che l'Uffizi federal da sanadad publica las ha approvadas. Las premias per las cassas da malsauns èn differentas da cassa a cassa e da lieu da domicil a lieu da domicil.

Calculatur da premias: Cumparegliai tut tenor tge cassa da malsauns e tge model che Vus tschernis

Desdir l'assicuranza fundamentala

Sche Vus vulais midar Vossa cassa da malsauns, faschais Vus quai per regla per la fin da l'onn. Mintgamai l'atun approvescha l'Uffizi federal da sanadad publica las premias per l'onn proxim. La nova premia As vegn communitgada en scrit tras Vossa cassa da malsauns fin il pli tard la fin d'october. Vus avais alura temp fin il pli tard ils 30 da november da desdir l'assicuranza. Attenziun: A questa data sto l'assicuranza avair survegnì Vossa brev da desditga.

Persunas assicuradas cun ina franschisa ordinaria (300 francs) han in ulteriur termin da desditga sin la fin da zercladur. Il termin da desditga è 3 mais.

Desdir l'assicuranza supplementara

Il termin per desdir l'assicuranza supplementara è per regla la fin da settember, ils termins da desditga pon esser differents. As infurmai en las cundiziuns contractualas u directamain tar Vossa cassa da malsauns. Las assicuranzas supplementaras e las assicuranzas fundamentalas n'èn betg colliadas ina cun l'autra. Ellas pon vegnir fatgas tar differentas cassas. Vus dastgais pia senz'auter midar Vossa cassa da malsauns per l'assicuranza fundamentala e laschar las assicuranzas supplementaras tar la cassa veglia.

Brevs da model per midar la cassa da malsauns e per desdir l'assicuranza supplementara

Detagls da la midada da l'assicuranza da basa a l'assicuranza supplementara