Las autoritads svizras online

directamain tar il cuntegn

Medischina da reproducziun

Sch'il giavisch da survegnir in uffant na s'accumplescha betg sin via natirala, po in pèr far diever da la medischina da reproducziun. Questas tecnicas da la medischina e da la biologia vegnan applitgadas en cas da la sterilitad da la dunna, da l'um u d'omadus.

Ina procedura da reproducziun dastga vegnir applitgada mo, sch'ella gida a surmuntar la sterilitad d'in pèr, sche las autras metodas da tractament han fatg naufragi u èn stadas senza success u, sch'il privel da transmetter ina greva malsogna nuncurabla als descendents na po betg vegnir evità autramain.

La diagnostica da preimplantaziun (DPI) è permessa be per pèrs ch’èn purtaders d’ina greva malsogna ereditara u che na pon betg survegnir uffant sin la via natirala.

Co proceder?

In pèr che vul far diever d'in tractament da la medischina da reproducziun consultescha in medi spezialist. Il medi spezialist analisescha ils motivs da la sterilitad ed infurmescha il pèr davart las metodas da tractament che stattan a disposiziun sco er davart las ristgas ch'èn colliadas cun las differentas metodas.En quest discurs da cussegliaziun vegni renvià a las alternativas da la medischina da reproducziun – sco per exempel a l'adopziun.

Tar tscherts tractaments sto vegnir purschì al pèr – tenor la Lescha davart la medischina da reproducziun – in accumpagnament psicologic durant e suenter il tractament. En il discurs da cussegliaziun vegni renvià a las alternativas tar la medischina da reproducziun – sco per exempel a l'adopziun.

Al cumenzament dal tractament sto il pèr dar ses consentiment en scrit per la procedura da reproducziun. Il pèr ha plinavant il dretg sin in accumpagnament psicologic durant e suenter il tractament. Pèrs che sa decidan per ina DPI ston ultra da quai vegnir infurmads davart dumondas geneticas.

Tranter il discurs da cussegliaziun e la decisiun da far il tractament sto il pèr avair temp da ponderaziun.
Al cumenzament dal tractament sto il pèr dar ses consentiment en scrit per la procedura da reproducziun planisada.

En Svizra datti centers en chantuns che porschan la medischina da reproducziun.

Donaziun da sperma

Il tractament cun sperma dà dastga vegnir applitgà mo tar conjugals. Cur che l'uffant ch'è vegnì procreà tras donaziun da sperma ha accumplì il 18avel onn da vegliadetgna po el dumandar infurmaziuns tar l'Uffizi federal dal stadi civil davart ses bab biologic. L'Uffizi infurmescha il donatur da sperma davart la dumonda d'infurmaziun.

Dumandar infurmaziuns davart ses bab biologic

Praticas scumandadas

La Lescha davart la medischina da reproducziun scumonda d'applitgar las suandantas praticas:

  • la donaziun d'in ov,
  • la donaziun d'embrios e
  • la maternitad substitutiva

Tge surpiglia la cassa da malsauns?

Ils custs per in tractament varieschan da cas a cas, èn dentant per regla magari auts. En il cas concret dat il medi al pèr – a chaschun da l'emprima consultaziun – ina survista cumpletta e detagliada davart ils custs probabels.

L'inseminaziun intrauterina (fertilisaziun artifiziala tras ina injecziun directa dal sperma en la madra) vegn indemnisada da l'assicuranza obligatorica da malsauns. Maximalmain vegnan dentant indemnisads trais ciclus da tractament per gravidanza.

La fertilisaziun in vitro e pli tard il transferiment da l'embrio na vegnan percunter betg indemnisads da l'assicuranza obligatorica da malsauns.

Ulteriuras infurmaziuns survegnis Vus tar Vossa assicuranza.