Las autoritads svizras online

directamain tar il cuntegn

Tscherna dal num tar la maridaglia e tar in partenadi da la medema schlattaina

Nov dretg dal num: Vus pudais, ma na stuais betg pli As decider per in num da famiglia cuminaivel cur che Vus maridais.

Nov dretg dal num: Vus pudais, ma na stuais betg pli As decider per in num da famiglia cuminaivel cur che Vus maridais.

Cun la nova lescha (dapi il 1. da schaner 2013) salvan ils conjugals lur num da famiglia cur ch'els maridan. Els pon però sa decider per in num da famiglia cuminaivel: per il num da nubil da la dunna u per il num da nubil da l'um. Quai vala er per pèrs da la medema schlattaina che han laschà registrar lur partenadi.

Nums dubels

  • Nums dubels sco per exempel Meier Müller na pon betg pli vegnir furmads cun maridar. Sch'ina persuna ha gia in num dubel, dastga ella duvrar vinavant quest num.
  • L'uschenumnà num d'allianza cun stritg d'uniun, sco per exempel Meier-Müller, è però anc adina permess. Il num d'allianza n'è betg in num uffizial e na vegn betg inscrit en il register da stadi civil; el po però vegnir duvrà en il mintgadi e vegnir inscrit sin dumonda en la carta d'identitad ed en il passaport.

Nums dals uffants

  • Uffants da geniturs maridads survegnan automaticamain il num da famiglia cuminaivel.
  • Conjugals che n'han betg in num da famiglia cuminaivel, ston fixar tar la maridaglia, tgenin da lur nums da nubil ch'ils uffants duain purtar. Entaifer 12 mais suenter la naschientscha da lur emprim uffant han ils geniturs lura la pussaivladad da declerar che l'uffant duaja purtar il num da nubil da l'auter genitur.

Dretg transitoric

  • Per pèrs che han maridà u che han laschà registrar lur partenadi avant l'onn 2013, n'exista nagina obligaziun da midar insatge vi da lur nums.
  • Sche Vus avais maridà avant l'onn 2013 ed avais midà Voss num e sche Vus essas anc adina maridà, pudais Vus declerar da tut temp davant l'uffizi da stadi civil che Vus veglias puspè purtar Voss num da nubil.

Midada dal num

Tgi stoss jau infurmar?

La midada da Voss num stuais Vus communitgar a las autoritads, al patrun, a l'administraziun da taglia, a la banca, a las assicuranzas e.u.v.

Adattar ils documents

N'emblidai betg da laschar actualisar ils suandants documents en cas che Vus avais midà Voss num:

  • passaport e carta d'identitad
  • certificat da la AVS
  • cartas da banca e da credit
  • permiss da manischar e document dal vehichel
  • e.u.v.

Inscripziun da la chascha da brevs

Il meglier inscrivais Vus Vossa chascha da brevs durant in pèr emnas cun Voss num vegl e cun Voss num nov. Sch'ina charta u in pachet porta anc Voss num vegl, infurmai per plaschair il speditur davart Voss num nov.