Las autoritads svizras online

directamain tar il cuntegn

Mancanzas en l'abitaziun

In stgaudament insuffizient, parasits u miffa – talas u sumegliantas mancanzas pon esser avant maun en l'abitaziun gia dal principi u pon sa mussar cun il temp. Tge po vegnir fatg cunter quai?

Glista da mancanzas

Cun surpigliar in'abitaziun sto en mintga cas vegnir fatga ina glista da mancanzas. Pli cler che quest protocol è, e meglier che quai è per il locatari. Bleras mancanzas vegnan constatadas pir suenter la surpigliada da l'abitaziun e pon anc vegnir avisadas pli tard – tut tenor il contract da locaziun – entaifer 10 fin 30 dis. Er durant il temp da locaziun pon sa mussar tuttenina mancanzas. Quellas ston vegnir annunziadas immediatamain en scrit al locatur.

In dretg da renovaziun per motivs estetics na datti betg: sgriffels en il parchet u maclas vi da la paraid alva ston ins acceptar per gronda part.

Il locatur è obligà d'allontanar las mancanzas entaifer il termin fixà. Sche quai n'è betg il cas, po il locatari depositar il tschains da locaziun e pretender ina reducziun dal tschains da locaziun. Las autoritads da mediaziun e las associaziuns dals locataris As sustegnan en quest connex.

Deposit dal tschains da locaziun

Sche locaturs n'adempleschan betg lur obligaziun d'allontanar mancanzas avisadas, ha il locatari il dretg da depositar il tschains da locaziun.

Per depositar correctamain il tschains da locaziun ston vegnir resguardadas intginas cundiziuns e formalitads. En quest connex pon ins sa drizzar a l'autoritad da mediaziun. Cun il deposit valan ils tschains da locaziun sco pajads.

Infurmaziuns, cussegliaziun

Autoritad chantunala da mediaziun (infurmaziuns, cussegliaziun, models)

L'autoritad da mediaziun infurmescha e cusseglia tant ils locataris sco er ils locaturs. Tar l'autoritad da mediaziun pon vegnir retratgs ils formulars necessaris.

Associaziuns da locataris resp. da locaturs

Er las associaziuns da locataris resp. da locaturs sustegnan las dumondas ed ils interess dals locataris resp. dals locaturs en connex cun il tschains da locaziun.