Tut las lavurantas e tut ils lavurants han il dretg da pausas. Pausas servan en emprima lingia per pussar e per mangiar.
La durada da la pausa dependa dal temp temp da lavur effectiv:
15 minutas tar in temp da lavur quotidian che surpassa 5 uras e mez
30 minutas tar in temp da lavur quotidian che surpassa 7 uras,
1 ura tar in temp da lavur quotidian che surpassa 9 uras; en quest cas po la pausa vegnir dividida.
Vossa patruna u Voss patrun As po er conceder pausas pli lungas.
Sche Vus avais temps da lavur flexibels e sch’il temp da lavur quotidian è tranter main che set e pli che nov uras, correspunda la durada da la pausa al ttemp da lavur quotidian en media.
Resguardai per plaschair:
Vossa patruna u Voss patrun po far in reglament da pausa: el u ella po per exempel pretender che Vus fetschias Vossa pausa durant in tschert temp u en in tschert lieu.
Fimadras e fimaders n’han nagin dretg da pausas supplementaras per fimar.
Pausas na valan betg sco temp da lavur; ellas na ston perquai er betg vegnir pajadas.
I valan las suandantas excepziuns:
sche Vus na pudais betg bandunar Vossa plazza da lavur durant la pausa, vala la pausa sco temp da lavur.
interrupziuns da lavur per motivs tecnics (p ex. interrupziun da la funcziun d’ina maschina) na valan betg sco pausa, perquai che Vus na pudais betg pussar durant quel temp. La durada da talas interrupziuns è memia curta e Vus na pudais betg prevair, cura che Vus pudais cuntinuar cun Vossa lavur.
Per regla fan ins pausas suenter la mesadad dal temp da lavur quotidian. Ellas servan a la recreaziun e per mangiar. Da la pausa na dastga perquai betg vegnir desistì; quai po manar a sbagls ed accidents.
Per il medem motiv na dastgais Vus betg lavurar tras per ir pli baud a chasa u per pudair cumenzar pli tard.
La pausa serva a la recreaziun durant il di da lavur. Il temp da paus quotidian percunter è il temp da recreaziun prescrit suenter in di da lavur:
il temp da paus sto durar almain 11 uras,
el cumenza cun la saira sontga e finescha cun il cumenzament da la lavur.
Vossa patruna u Voss patrun po reducir il temp da paus quotidian ina giada l’emna ad 8 uras. Quai è dentant mo permess, sche la durada regulara dad 11 uras vegn resguardada en la media da duas emnas.
Resguardai per plaschair: per giuvenils fin 18 onns sto il temp da paus quotidian en mintga cas durar almain 12 uras.
Ulteriuras infurmaziuns davart las pausas e davart il temp da paus quotidian chattais Vus sin la pagina d’internet correspundenta dal Secretariat da stadi per l’economia (SECO) ed en la broschura dal SECO «Temps da lavur e da paus».