Avant che Vus cumenzais cun in’activitad da gudogn independenta, stuais Vus per forza sclerir in pèr puncts impurtants. Quai vul dir, che Vus stuais decider tge furma giuridica che Vossa interpresa futura vegn ad avair (firma singula, ScRL, SA ... ); ultra da quai stuais Vus far in plan da business.
Il portal per interpresas pitschnas e mesaunas dal Secretariat da stadi per l’economia infurmescha e porscha ina glista cun dumondas che Vus stuessas sclerir avant che fundar in’atgna interpresa.
Resguardai per plaschair: sche Vus vulais fundar ina interpresa en Svizra sco persuna estra, chattais Vus infurmaziuns sin ina pagina speziala dal portal per interpresas pitschnas e mesaunas dal Secretariat da stadi per l’economia.
Tut tenor la furma giuridica che Vus avais tschernì per Vossa interpresa essas Vus obligada u obligà d’As laschar registrar en il Register da commerzi u pudais Vus far quai sin basa voluntara.
Per la registraziun en il Register da commerzi avais Vus las suandantas pussaivladads:
Vus As annunziais tar l’Uffizi dal register da commerzi da Voss chantun
Vus As registrais online sur il spurtegl uffizial da Easygov
Detagls davart las cundiziuns ed ils custs per la registraziun en il Register da commerzi chattais Vus sin il portal per interpresas pitschnas e mesaunas dal Secretariat da stadi per l'economia sin la pagina Register da commerzi: dretgs e duairs per IPM/KMU.
Sche Vus vulais daventar independenta u independent professiunalmain, stuais Vus As occupar da las assicuranzas, spezialmain da las suandantas:
Sche Vus occupais emploiadas u emploiads, stuais Vus er As occupar da las assicuranzas correspundentas.
Infurmaziuns davart la dumonda tge assicuranzas che Vus stuais avair e davart il proceder chattais Vus sin la pagina correspundenta dal portal dad IPM/KMU dal Secretariat da stadi per l'economia.
Sche Vossa svieuta annuala è probablamain sur 100’000 francs, stuais Vus As annunziar voluntarmain tar l’Administraziun federala da taglia (AFT).
Cun il questiunari online da la AFT vegnis Vus a savair, schebain Vossa interpresa sto pajar taglia sin la plivalur; sche quai è il cas, As registrai sin EasyGov ed As annunziai online per la TPV: EasyGov.swiss – Il spurtegl online per interpresas.
Explicaziuns davart la taglia sin la plivalur chattais Vus sin il portal per IPM/KMU dal Secretariat da stadi per l'economia e sin la pagina «TPV».
Sut tschertas cundiziuns pudais Vus As laschar sbursar il chapital da Vossa 2. pitga (provediment professiunal tenor LPP) e – sche avant maun - da Vossa 3. pitga per daventar independenta u independent.
Las cundiziuns ed ils proceders prescrits chattais Vus sut: 2. pitga (chapitel «Sbursament anticipà da la 2. pitga tar il cumenzament dad in’activitad da gudogn independenta») e 3. pitga (chapitel «Retratga dal dabun: termin pussibel»).
Tut tenor la furma giuridica che Vus avais tschernì per Vossa interpresa stuais Vus pajar taglias.
La suandanta survista dal Secretariat da stadi per l'economia mussa, en tge cas ch’ins sto pajar taglias:
Furma da la societad | Confederaziun | Chantun | Vischnanca/baselgia |
|---|---|---|---|
Societads da persunas
| Taglia federala directa da las entradas | Taglia sin las entradas e sin la facultad | Supplements e reducziuns tar la taglia dal stadi, per part atgnas tariffas e disposiziuns |
Societads da chapital
| Taglia federala directa dal gudogn | Taglia sin il gudogn e sin il chapital | Supplements u reducziuns tar la taglia dal stadi |
Infurmaziuns detagliadas davart las taglias che Vus stuais pajar sco interprendidra u interprendider chattais Vus sin la survista dal portal dad IPM/KMU dal Secretariat da stadi per l'economia.
Sin la pagina «Gener da taglias» chattais Vus ulteriurs detagls davart las taglias en Svizra.
Il servetsch online gratuit «Easygov» dal Secretariat da stadi per l'economia As sustegna tar tut ils pass che Vus stuais far per daventar independenta u independent professiunalmain.
Il portal uffizial per interpresas pitschnas e mesaunas porscha ina glista da controlla per persunas cun professiun independenta per che Vus n’emblidais segiramain nagut.
Glista da links survesaivla davart servetschs d’autoritads: www.online-services.admin.ch
Resguardai per plaschair: Sche Vus, sco persuna estra, vulais fundar ina interpresa, consultai er la pagina Burgais esters: fundaziun d’interpresas dal portal per IPM.