Sin plaun naziunal
Ina iniziativa federala dal pievel ha pretendì ina paja minimala da 4000 francs per mais (22 francs per ura). Il pievel ha dentant refusà questa iniziativa l’onn 2014.
En la cumparegliaziun internaziunala èn las pajas svizras dentant autas, er sch’i na dat nagina paja minimala sin plaun naziunal.
Sin plaun chantunal
Ils ultims onns han differents chantuns introducì ina paja minimala sin plaun chantunal:
chantun Tessin: tranter 19,75 e 20.25 francs per ura, tut tenor sectur economic
En contracts collectivs da lavur e contracts normals da lavur
En tschertas branschas han sindicats e federaziuns da patruns negozià pajas minimalas. Quellas èn fixadas en contracts collectivs da lavur (CCL) u en contracts normals da lavur (CNL) da la branscha correspundenta.
Sche Vus lavurais en ina branscha cun ina paja minimala, na dastga Vossa paja da princip betg esser sut la paja minimala ch’è fixada en il CCL u en il CNL da Vossa branscha.
Ils sindicats svizzers As pon infurmar en detagl davart las dumondas, en tgeninas branschas che vala ina paja minimala, tge cundiziuns de valan e tgi che profita da quellas.
L’Uffizi federal da statistica registrescha il svilup da las pajas en Svizra en il decurs dals onns, tenor secturs e tenor branschas.
Calculatur naziunal da pajas
Sche Vus vulais savair tge paja mediana che vegn normalmain pajada en Svizra per ina tscherta lavur per mais, pudais Vus utilisar il calculatur naziunal da pajas. Quel vegn mess a disposiziun dal Secretariat da stadi per l’economia (SECO) e da las autoritads svizras dal martgà da lavur.
La Constituziun federala e la Lescha d’egualitad pretendan l’egualitad da paja per umens e dunnas. Quai vul dir: per la medema lavur ston ina dunna ed in um survegnir la medema paja. En cas da discriminaziun da paja pudais Vus consultar la pagina correspundenta dal Biro federal d’egualitad. Là chattais Vus infurmaziuns ed adressas utilas.