Lavurar en Svizra sco persuna estra.

Burgaisas e burgais da la UE/AECL

Grazia a la libra circulaziun da persunas cun la UE/AECL pudais Vus entrar, abitar e lavurar en Svizra.

Tge èsi da far en cas d’ina activitad da curta durada?

Vus na duvrais nagina permissiun da dimora, sche Vus lavurais durant maximalmain trais mais per in patrun en Svizra u sche Vus prestais in servetsch en Svizra durant maximalmain 90 dis per onn chalendar.

Vossa patruna u Voss patrun sto dentant annunziar Vossa activitad da gudogn a maun da la procedura d’annunzia per in’activitad da gudogn a curt termin il pli tard in di avant il cumenzament da Vossa activitad.

Tge èsi da far en cas d’ina activitad che dura pli ditg che trais mais?

Avant che Vus cumenzais cun Vossa activitad da gudogn, stuais Vus dumandar ina permissiun da dimora tar Vossa vischnanca da domicil en Svizra. Per quest intent stuais Vus preschentar ils suandants documents:

carta d’identitad valaivla u passaport valaivel
ina decleraziun d'engaschament da Vossa patruna u Voss patrun u in attest da lavur (p.ex. in contract da lavur)

La permissiun da dimora vala per l’entira Svizra. Ella permetta da midar la lavur ubain la patruna u il patrun. La valaivladad da la permissiun dependa da la durada da l’engaschament.

Tge vala per persunas cun in’activitad da gudogn independenta?

Vus stuais annunziar Voss arriv entaifer 14 dis tar la vischnanca da domicil e dumandar là ina permissiun da dimora. Per quest intent stuais Vus preschentar ils suandants documents:

ina carta d’identitad valaivla u in passaport valaivel
ina cumprova che Vus avais u vegnis ad avair in’activitad da gudogn independenta cun entradas che As permettan da finanziar Voss custs da viver e quels da Vossa famiglia (p.ex. cudeschs da fatschenta e contabilitad)

Co tschertgan ins ina plazza en Svizra?

Vus pudais vegnir en Svizra e tschertgar ina plazza durant maximalmain sis mais. Per ils emprims trais mais na duvrais Vus nagina permissiun. Alura pudais Vus dumandar ina permissiun da dimora curta UE/AECL. Questa permissiun vala per trais mais ad onn. Premess vegni dentant, che Vus possias finanziar Voss custs da viver.

Ulteriuras infurmaziuns chattais Vus sin la pagina Burgaisas e burgais da la UE/AECL: viver e lavurar en Svizra dal Secretariat da stadi per migraziun. Vus pudais er As drizzar a las autoritads chantunalas da migraziun e dal martgà da lavur.

Essas Vus dal Reginavel Unì?

Dapi il 1. da schaner 2021 n’èn las burgaisas ed ils burgais dal Reginavel Unì betg pli burgaisas e burgais da la UE. Per ellas ed els valan ussa ils contingents e las disposiziuns per persunas d’in terz stadi.

En cas che Vus avevas gia avant l’onn 2021 il dretg da dimora en Svizra, pudais Vus profitar da las disposiziuns spezialas en la Cunvegna tranter la Svizra ed il Reginavel Unì davart ils dretgs acquistads da las burgaisas e dals burgais.

Ultra da quai han la Svizra ed il Reginavel Unì concludì ina cunvegna davart la libra circulaziun da furniturs da servetschs. Fin la fin da l’onn 2023 ston furniturs da servetschs dal Reginavel Unì cun in’activitad da curta durada en Svizra – quai vul dir per ina durada da main che 90 dis per onn chalendar – s’annunziar sur la procedura d’annunzia per in’activitad da gudogn a curt termin.

Ulteriuras infurmaziuns chattais Vus sin la pagina Reginavel Unì dal Secretariat da stadi per migraziun sco er qua sutvart sut la rubrica Vus n’essas betg burgaisa u burgais da la UE/AECL.

Vus n’essas betg burgaisa u burgais da la UE/AECL

Tgi po lavurar en Svizra?

Burgaisas e burgais da stadis d’ordaifer la UE/AECL pon lavurar en Svizra mo, sch’els èn spezialmain qualifitgads. Quai pon esser per exempel persunas da cader, spezialistas e spezialists, persunas cun in diplom d’instrucziun per scolas pli autas e cun experientschas professiunalas da plirs onns.

Ina permissiun da lavur è er necessaria per in’activitad da gudogn a curt termin. Il dumber da permissiuns è limità.

Ina permissiun po vegnir concedida er en cas d’ina activitad da gudogn independenta. Las consortas ed ils consorts da persunas cun dretg da burgais svizzer u cun ina permissiun da domicil na dovran nagina permissiun.

Premissas

Vossa patruna futura u Voss patrun futur sto mussar ch’igl è en l’interess economic da la Svizra, sch’ella u el engascha Vus, e ch’ella u el n’ha betg pudì chattar persunal adattà sin il martgà da lavur svizzer e da la UE/AECL.

La patruna u il patrun sto engaschar Vus sut la medemas cundiziuns da paja e da lavur sco burgaisas svizras e burgais svizzers.

Co retschaivan ins ina permissiun?

En Svizra sto Vossa patruna futura u Voss patrun futur far ils pass necessaris per survegnir da l'autoritad chantunala da migraziun e dal martgà da lavur ina permissiun per in’activitad da gudogn.

En cas che Vus vulais avair in’activitad da gudogn independenta, stuais Vus procurar sezza u sez la permissiun.

Sin la pagina dal Secretariat dal stadi per migraziun vegnis Vus a savair dapli davart il proceder per persunas che n’èn betg burgaisas da la UE/AECL.

La permissiun da lavur na dat betg exnum il dretg d’entrar en Svizra. Tut tenor la naziunalitad duvrais Vus er anc in visum. Scleri, sche quai pertutga Vus e co che Vus stuais proceder. Consultai per quest intent la pagina Visums per persunas estras.

Suenter Voss arriv en Svizra stuais Vus As annunziar entaifer 14 dis tar la controlla d’abitants da Vossa vischnanca da domicil. Quai è ina premissa per pudair cumenzar cun Vossa lavur.

N’emblidai betg d’As assicurar

Sche Vus vegnis en Svizra per lavurar, entrais Vus en il sistem svizzer d’assicuranzas socialas. Betg tut las contribuziuns d’assicuranzas vegnan deducidas directamain da la paja.

L’assicuranza da malsauns è obligatorica, ma privata. Vus stuais far in contract per Vus e per Vossa famiglia tar ina cassa da malsauns privata, e quai entaifer trais mais suenter Voss arriv u suenter avair cumenzà cun in’activitad da gudogn en Svizra. Ulteriuras infurmaziuns chattais Vus sin la pagina Prestaziuns da la cassa da malsauns.

In’assicuranza d’accidents privata stuais Vus concluder mo, sche Vus lavurais damain che otg uras per emna. Sche Vus lavurais dapli, As sto la patruna u il patrun assicurar. La premia d’assicuranza vegn deducida da Vossa paja.

Infurmaziuns

Il Secretariat da stadi per migraziun metta a disposiziun ulteriuras infurmaziuns sin sia pagina Burgaisas e burgais da la UE/AECL: viver e lavurar en Svizra.
Ultra da quai porscha el ulteriuras infurmaziuns sin sia pagina Procedura per persunas che n’èn betg burgaisas da la UE/AECL.
Vus pudais er consultar las disposiziuns davart il Reginavel Unì.
Qua chattais Vus ina glista cun las indicaziuns da tut las autoritads chantunalas da migraziun e dal martgà da lavur.
Ulteriuras infurmaziuns chattais Vus sin las paginas davart las permissiuns da dimora e davart ils visums.
Infurmaziuns davart la cassa da malsauns e davart l’assicuranza d’accidents chattais Vus sin las paginas correspundentas da ch.ch.
Qua chattais Vus infurmaziuns davart il sistem svizzer d’assicuranzas socialas.
EasyGov sustegna las patrunas ed ils patruns en connex cun annunzias e cun permissiuns dal dretg da persunas estras e trametta ils documents a l'autoritad responsabla. EasyGov.swiss – Il spurtegl online per interpresas.

Tschertga

Lavurar en Svizra sco persuna estra