Canortas da las vischnancas
Suenter il congedi da maternitad avais Vus la pussaivladad da laschar tgirar Voss uffants durant il di en ina canorta d’uffants da Vossa vischnanca. Tut tenor la disponibilitad ed il basegn po quai esser in u plirs dis ad emna.
As infurmai a temp tar Vossa vischnanca davart canortas d’uffants e davart las plazzas libras en Vossa regiun.
- Nagins resultats
Canortas privatas u semipublicas
Ultra da las canortas publicas datti instituziuns che vegnan manadas d’organisaziuns sco l’Associaziun per la tgira d’uffants da la Svizra taliana (Associazione Svizzera Strutture d’Accoglienza per l’Infanzia), la Fundaziun Tgira d'uffants en Engiadin'Ota u la pagina d’internet Kinderkrippen-Online.
As infurmai a temp tar Vossa vischnanca davart canortas d’uffants privatas u semipublicas en Vossa regiun.
Canortas d’interpresas
Diversas interpresas mettan a disposiziun atgnas canortas per ils uffants da las collavuraturas e dals collavuraturs. As infurmai tar Voss patrun davart las pussaivladads e davart las cundiziuns per la tgira d’uffants.
Sch’i èn avant maun avunda plazzas libras, porschan questas canortas er plazzas per uffants da geniturs che na lavuran betg en l’interpresa. As infurmai tar Vossa vischnanca da domicil.
- Nagins resultats
En tscherts cas pudais Vus laschar tgirar Voss uffants en ina scolina gia avant la vegliadetgna da scolina. Normalmain è quai pussaivel duas fin trais giadas ad emna per in pèr uras al di. La tgira durant l’entir di n’è dentant betg pussaivla. As infurmai tar Vossa vischnanca davart la purschida en Vossa regiun.
- Nagins resultats
En Svizra pudais Vus er As drizzar ad uschenumnads «geniturs dal di». Savens han quels agens uffants e pon tgirar er Voss uffants durant il di. Blers geniturs dal di èn commembers d’ina associaziun da famiglias dal di che garantescha in servetsch segir e da buna qualitad. As drizzai a la Federaziun svizra per la tgira d'uffants (kibesuisse) per infurmaziuns davart la disponibilitad, davart ils temps da tgira e davart ils custs.
Maisa da mezdi
Scolas, gruppas da geniturs u associaziuns privatas u semipublicas organiseschan mintgatant ina tgira d’uffants sur mezdi. Quella cumpiglia er il gentar.
Tut tenor il chantun u la vischnanca po quella purschida avair differentas furmas.
- Nagins resultats
Scola dal di
Dapi intgins onns datti ultra da las canortas er scolas dal di che tgiran ils uffants la damaun avant l’instrucziun u durant la pausa da mezdi. As infurmai per plaschair tar l’autoritad da scola da Voss chantun u da Vossa vischnanca.
- Nagins resultats
I po esser che Voss uffant vegn malsaun e na po betg ir a la canorta, a scolina u a scola. Tge far, sche Vus n’avais nagin che po tgirar Voss uffant entant che Vus essas a la lavur?
Vus avais il dretg da survegnir da Voss patrun fin trais dis congedi pajà per tgirar Voss uffant malsaun. La cundiziun è che Vus possias mussar in attest dal medi.
Tuttina essas Vus obligada u obligà da chattar ina soluziun alternativa (p.ex. tgira da l’uffant tras confamigliars u tras enconuschents). Questa obligaziun na vala betg, sch’i sa tracta d’in cas d’urgenza che pretenda exnum la preschientscha d’in genitur, per exempel en cas d’ina greva malsogna d’in uffant pitschen.
Sch’i sa tracta d’ina greva malsogna (u er d’in accident), pudais Vus er vegnir dispensada u dispensà da la lavur per in temp pli lung. Sut talas circumstanzas avais Vus sco geniturs il dretg da totalmain 14 emnas congedi pajà (80 pertschient da la paja) per tgirar Voss uffant malsaun u blessà. Er en quest cas stuais Vus preschentar in attest dal medi.
Sch’i n’è betg pussaivel da laschar tgirar Voss uffant da parents u d'enconuschents, pudais Vus As drizzar a la Crusch Cotschna Svizra. Quella porscha in servetsch da tgira per a chasa. Ina persuna da tgira spezialisada s’occupa da Voss uffant, gioga cun el, prepara il gentar e dat tenor basegn er medicaments. Quest servetsch vala per uffants fin dudesch onns. Intginas cassas da malsauns surpiglian quests custs.
Ils custs per la tgira ordaifer la famiglia varieschan per regla tenor il chantun e tenor las entradas. Contactai las differentas instituziuns per survegnir infurmaziuns en Voss cas specific.
Contactai sco emprim Vossa vischnanca da domicil per As infurmar davart l’entira purschida da sustegn ordaifer la famiglia en Vossa regiun.
Infurmaziuns detagliadas en connex cun Voss dretg da congedi pajà per tgirar Voss uffants malsauns survegnis Vus da Voss patrun ubain sin la pagina correspundenta da l’Uffizi federal d’assicuranzas socialas.