Sche Vus essas bab, avais in’activitad da gudogn dependenta u independenta e vegnis pajà per questa lavur, pudais Vus pretender in congedi da l'auter genitur (congedi da paternidad). Valair valan las suandantas cundiziuns:
Vus essas il bab giuridic da l’uffant.
Durant ils nov mais avant la naschientscha da Voss uffant eras Vus assicurà tar la AVS.
Durant la gravidanza da la mamma avais Vus lavurà durant almain tschintg mais.
Sche Vus essas il conjugal da la mamma biologica, avais Vus er il dretg d’in congedi da l'auter genitur sut las suandantas cundiziuns:
L’uffant è vegnì schendrà a maun d’in dun da sems confurmamain a la Lescha davart la medischina da reproducziun.
Vus essas maridà cun la mamma biologica il mument da la naschientscha da l’uffant.
Vus ademplis las medemas cundiziuns sco il bab concernent l’activitad da gudogn e las taglias (guardar survart).
Vus avais er il dretg d’ina indemnisaziun en cas da auter genitur, sche Vus survegnis diarias da l'assicuranza d’invaliditad, da malsauns, d’accidents u da dischoccupaziun. As infurmai en chaussa tar Voss patrun u tar l’assicuranza correspundenta.
Vus pudais pretender in congedi pajà da duas emnas (14 diarias). L’indemnisaziun importa 80 pertschient da la paja, dentant maximalmain 220 francs per di. Reglaments chantunals, reglaments dal persunal e contracts collectivs da lavur pon prevair soluziuns pli generusas.
Sche Vus survegnis ina indemnisaziun d’ina assicuranza (guardar survart), è l’indemnisaziun en cas da auter genitur almain uschè auta sco l’indemnisaziun che Vus survegnis il mument da la naschientscha da Voss uffant (u uschè auta sco l’indemnisaziun che Vus pudessas pretender, sche Vus la dumandassas).
Sche la mamma sparta durant las 14 emnas suenter la naschientscha da l’uffant, ha il u la consorta surviventa il dretg d’in congedi supplementar da 14 emnas.
Cuntrari al congedi da maternitad è il congedi da l'auter genitur flexibel. Vus al pudais retrair en ina giada u sco singuls dis – dentant entaifer 6 mais suenter la naschientscha da l’uffant.
Vus n’avais betg il dretg da prolungar Voss congedi da segund genitur. Sche Vus vulais prolungar il congedi, sto Voss patrun esser d’accord.
Resguardai: As infurmai davart Vossa garanzia tras l’assicuranza avant che Vus dumandais in congedi nunpajà.
Sin la pagina d’internet da la AVS/AI chattais Vus in Fegl d’infurmaziun davart l’indemnisaziun da l'auter genitur e Dumondas e respostas davart l’indemnisaziun da l'auter genitur (en tudestg).