Sche Vus lavurais e sche Vus exercitais in’activitad da gudogn, avais Vus il dretg d’in congedi d’adopziun pajà da duas emnas sut las suandantas cundiziuns:
Vus essas stà assicurà tar la AVS durant ils 9 mais che precedan l’adopziun da l’uffant;
Vus avais exercità in’activitad da gudogn durant almain 5 mais durant questa perioda;
l’uffant è sut 4 onns.
Sche Vus essas dischoccupà u incapabel da lavurar il mument da l’adopziun da l’uffant, n’avais Vus betg il dretg d’in supplement d’adopziun.
Per ils geniturs che adopteschan l’uffant da lur conjugala u da lur conjugal resp. da lur partenaria u da lur partenari n’è previs nagin congedi pajà.
Il congedi d’adopziun sto vegnir prendì en il decurs da l’onn che suonda l’adopziun da l’uffant. El po vegnir prendì en ina giada, en emnas u sco dis singuls. Vus pudais tscherner tgenin dals dus geniturs che survegn quest congedi da duas emnas. Vus al pudais er reparter sin omadus, però senza prender ils dis a medem temp.
Il supplement d’adopziun correspunda ad 80 % da la paja mesauna da l’activitad da gudogn obtegnida avant l’adopziun da l’uffant, ma maximalmain 220 francs per di. Il supplement d’adopziun na vegn betg surdà automaticamain. El sto vegnir dumandà tar la cassa federala da cumpensaziun.
Sco geniturs adoptivs n’avais Vus nagin dretg legal da prolungar il congedi. Ina tala prolungaziun è mo pussaivla, sche Vus As pudais metter d’accord cun Vossa patruna u Voss patrun.
Resguardai: As infurmai davart Vossa garanzia tras l’assicuranza avant che Vus dumandais in congedi nunpajà.
Sin la pagina d’internet da la AVS/AI chattais Vus in Fegl d’infurmaziun davart l’indemnisaziun d’adopziun e Dumondas e respostas davart l’indemnisaziun d’adopziun (en tudestg).