Disditga dal contract da lavur en Svizra.

Brev da disditga

Furma

Sche Vus vulais terminar la relaziun da lavur, stuais Vus communitgar quai a Voss patrun respectivamain a Vossa lavuranta u a Voss lavurant.

En il contract da lavur è per regla inditgà, sche la disditga sto vegnir fatga en scrit. Sche quai n’è betg il cas, basta ina disditga a bucca.

Vus stuais garantir che Vossa lavuranta u Voss lavurant respectivamain Voss patrun survegnia er propi la disditga. La disditga vala numnadamain pir a partir dal mument, cur che l’autra partida ha survegnì ella. Nus recumandain da trametter la disditga sco brev inscritta. Vus pudais dentant er surdar la brev da disditga directamain. Dumandai en quel cas ina conferma en scrit da la retschavida, per exempel sin ina copia da Vossa brev da disditga.

Cuntegn

La brev da disditga sto cuntegnair almain ils suandants puncts:

indicaziuns correctas ed exactas (num, adressa) davart la lavuranta u il lavurant respectivamain davart la patruna u il patrun
indicaziuns davart il contract da lavur che duai vegnir schlià (contract da lavur dals X-Y-20ZZ … )
data, cur ch'il contract da lavur duai vegnir schlià (normalmain per la fin dal mais; resguardai il termin da disditga
la disditga sto esser suttascritta e cuntegnair la data.

Resguardai per plaschair: en Svizra n’essas Vus betg obligada u obligà da numnar in motiv da disditga. L’autra partida po dentant pretender, che Vus motivais la disditga. En quel cas stuais Vus inditgar en scrit il motiv per la disditga.

Muster per ina brev da disditga

Qua pudais Vus telechargiar in muster per ina brev da disditga.

Model d'ina desditga

Termin da disditga

Resguardar il termin

Sche Vus vulais terminar la relaziun da lavur, stuais Vus resguardar il termin da disditga inditgà en il contract da lavur. Sche Voss contract da lavur u il contract collectiv da lavur na cuntegna nagin termin da disditga, valan ils suandants termins:

durant il temp da prova: 7 dis da chalender
durant l’emprim onn d’engaschament: 1 mais, disditga pussaivla mintgamai per la fin dal mais (exempel: sche la data da disditga è ils 13 da zercladur e sche Vus avais in termin da disditga dad 1 mais, finescha Voss contract da lavur ils 31 da fanadur.)
dal segund fin al novavel onn d’engaschament: 2 mais, mintgamai per la fin dal mais
a partir dal dieschavel onn d’engaschament: 3 mais, mintgamai per la fin dal mais

In contract da lavur limità va automaticamain a fin a la data fixada. Per regla na po il contract betg vegnir disditg ordavant, danor per motivs impurtants u sch’il contract sco tal prevesa questa pussaivladad.

Il patrun da lavur e la lavuranta u il lavurant pon dentant terminar en enclegientscha vicendaivla anticipadamain in contract da lavur limità , sch’els resguardan las prescripziuns da la lescha.

Sche Vus n’avais suenter il termin da disditga nagina lavur, stuais Vus As annunziar sco dischoccupada u dischoccupà. As infurmai sin la pagina Dischoccupaziun.

Malsogna u accident durant il temp da disditga

Sche Vus vegnis malsauna u malsaun u sche Vus avais in accident suenter la disditga, è il termin da disditga interrut per quel temp che Vus mancais per motivs da malsogna u d’accident. Il termin cuntinuescha, cur che Vus pudais puspè lavurar e vegn prolungà fin al proxim termin da disditga pussaivel (per exempel fin a la fin dal mais).

Vacanzas durant il temp da disditga

Durant il temp da disditga pudais Vus da princip retrair Vossas vacanzas restantas. Il patrun po dentant refusar la retratga da vacanzas, sch’igl è avant maun ina situaziun d’urgenza en il manaschi. En quest cas pudais Vus As cunvegnir cun Voss patrun ch’el As paja ils dis da vacanzas restants.

Disditga e temp da bloccada

Suenter il temp da prova, en cas da malsogna u d'accident na dastga Voss patrun betg disdir Voss contract da lavur. En ils suandants cas èn las persunas emploiadas protegidas cunter la disditga durant l'uschenumnà temp da bloccada:

30 dis durant l’emprim onn d’engaschament
90 dis a partir dal segund fin al tschintgavel onn d’engaschament
180 dis a partir dal sisavel onn d’engaschament

Il medem vala en cas da gravidanza e las emprimas 16 emnas suenter la naschientscha. Sin la pagina Protecziun da dunnas en speranza e da mammas a la plazza da lavur chattais Vus ulteriuras infurmaziuns davart quest tema.

En tut quests cas sto il patrun spetgar fin che la lavuranta u il lavurant turna a la lavur. Pir alura è ina disditga permessa.

Impurtant: sco lavuranta u lavurant pudais Vus disdir Voss contract da lavur er durant in termin da bloccada.

Ulteriuras infurmaziuns e contacts

Il Secretariat da stadi per l’economia (SECO) metta a disposiziun ina glista da FAQ. Là chattais Vus infurmaziuns detagliadas davart ils temas disditga, protecziun cunter la disditga per lavurantas e lavurants durant il temp da bloccada, vacanzas durant il temp da disditga e.u.v. Ultra da quai chattais Vus là infurmaziuns davart la protecziun cunter la disditga durant il servetsch obligatoric da militar u civil.

Tschertga

Disditga