Sche Vus vegnis engaschada u engaschà d'ina patruna u d'in patrun da lavur (respectivamain sche Vus sco patruna u patrun da lavur engaschais da nov ina persuna), stuais Vus suttascriver in contract da lavur. En quel vegnan fixads ils dretgs e duairs en reguard a la relaziun da lavur per tuttas duas partidas.
Il contract da lavur vegn suttascrit da tuttas duas partidas. Quel sto cuntegnair almain ils suandants puncts:
il num da la lavuranta u dal lavurant ed il num da la patruna u dal patrun
la data dal cumenzament da la relaziun da lavur
la funcziun da la lavuranta u dal lavurant
la paja ed eventuals supplements da paja
il temp da lavur emnil
Tar contracts da lavur temporars sto la patruna u il patrun inditgar exactamain la data da la fin dal contract da lavur.
Reglaments spezials, per exempel in scumond da concurrenza u il reglament da sururas, ston medemamain esser fixads en il contract da lavur.
In contract collectiv da lavur (CCL) è in contract tranter uniuns da patruns ed uniuns da lavurants/sindicats. Las duas partidas fixeschan las pretensiuns minimalas ch’èn da resguardar (per exempel la paja minimala). En Svizra datti numerus CCL, per exempel per la professiun da coiffeurs, per la branscha da construcziun, per servetschs da segirtad privats u per la professiun da pasterners, pastiziers e conditers.
Per il solit valan CCL naziunals che reglan las cundiziuns per la professiun correspundenta en l’entira Svizra. I dat dentant er CCL da firmas (per exempel da Migros e Coop) u CCL regiunals che valan mo per ina tscherta interpresa respectivamain en ina tscherta regiun.
Per branschas senza contract collectiv da lavur pon las autoritads da la Confederaziun u dal chantun decretar in contract normal da lavur (CNL). En quel èn fixadas pajas minimalas impegnativas. Las cundiziuns dal CNL pon vegnir midadas da la patruna u dal patrun mo en favur da las lavurantas e dals lavurants.
In CNL vegn en funcziun, sche las cundiziuns da paja regularas da la branscha u dal lieu n’èn repetidamain betg vegnidas resguardadas. Il CNL duai evitar quai.
In exempel per in CNL sin nivel naziunal è il CNL per l’economia da chasa. Quel ed exempels per CNL chantunals èn da chattar sin la pagina d’internet dal Secretariat da stadi per l’economia (SECO).
Ulteriuras infurmaziuns davart contracts da lavur èn da chattar sin la pagina correspundenta dal Secretariat da stadi per l’economia (SECO).
Il SECO metta a disposiziun ina pagina cun FAQ davart il dretg da lavur ed adressas nizzaivlas. Ina cussegliaziun tras ils posts correspundents è per regla fitg favuraivla u gratuita.
Infurmaziuns detagliadas davart il tema CCL datti sin la pagina d’internet correspundenta dal SECO. Là chattais Vus er la glista cumpletta dals CCL naziunals e dals CCL chantunals