Las autoritads svizras online

directamain tar il cuntegn

Largias da contribuziun tar l'AVS

Cun activitad da gudogn u senza: Las contribuziuns a l'Assicuranza per vegls e survivents (AVS) ston vegnir pajadas. Per lavurants vul quai dir a partir dal 1 da schaner suenter il 17avel anniversari fin tar avair finì l’activitad da gudogn ordinaria (dunnas 64 onns ed umens 56 onns) ubain fin la fin da l’activitad da gudogn, sch’insatgi lavura anc vinavant. Persunas senza ina activitad da gudogn ston pajar contribuziuns a partir dal 1 da schaner suenter avair cumplenì il 20avel anniversari fin cur ch’ellas han cuntanschì la vegliadetgna da renta ordinaria. Largias da contribuziun tar la AVS han per consequenza che la renta da la AVS vegn reducida. In onn da contribuziun che manca chaschuna per regla ina reducziun dad almain 2,3 %. Sche vus n’avais betg ina activitad da gudogn, valan vossas contribuziuns sco pajadas en il cas che voss conjugal u vossa conjugala resp. voss partenari registrà u vossa partenaria registrada ha ina activitad da gudogn e paja ensemen cun il patrun almain il dubel da la contribuziun minimala (2 x 482 francs = 964 francs).

Motivs per largias da contribuziun

Vus stuais star spezialmain attent d'obtegnair in rendaquint da las contribuziuns senza largias. E quai:

  • sche Vus lavurais savens mo per curt temp tar differents patruns,
  • en cas d'ina dimora pli lunga a l'exteriur;
  • sche vus survegnis diarias d’ina assicuranza en cas d’in accident u d’ina malsogna e
  • sche Vus na pajais naginas contribuziuns a la AVS durant ils onns da studi.

Dumandar in extract dal conto

Per controllar, sch'i dat largias da contribuziun, pudais Vus dumandar en scrit u tras l'internet (vesair il link qua sutvart) in extract cumplet. Quel demussa, sch'i dat largias u betg. Entaifer 30 dis suenter la consegna pudais Vus pretender ina rectificaziun tar la cassa da cumpensaziun.

Serrar las largias da contribuziun

Largias pon vegnir serradas cun pajar suenter las contribuziuns mancantas. Quai è però mo pussaivel per largias ch'èn resultadas per temps, durant ils quals Vus essas stà assicurà en Svizra e ch'èn capitadas durant ils ultims tschintg onns. Per largias ch'èn pli veglias na pudais Vus pajar suenter pli nagut.

Sch'i dat largias, perquai che Voss patrun n'ha betg pajà las contribuziuns da la cassa da cumpensaziun, stuais Vus pudair cumprovar che Vus hajas lavurà il temp en dumonda e che Voss patrun ha deducì las contribuziuns da la AVS da Voss salari. Sche questa cumprova po vegnir furnida, vegnan las entradas correspundentas bunifitgadas – er alura, sche la cassa da cumpensaziun na po betg pli incassar las contribuziuns dal patrun da quella giada.

Sche Vus constatais ina largia da contribuziun

Contactai la cassa da cumpensaziun ch'era cumpetenta per la retratga da la contribuziun cur che la largia da contribuziun è capitada ubain quella che incassescha oz Vossa contribuziun. Furni ils mussaments (p.ex. attest da salari e rendaquints dal salari) che cumprovan vardaivlamain Voss dretgs da salari.

Chattai Vossa cassa da cumpensaziun

Transferiment dal domicil e / u activitad da gudogn a l'exteriur

  • Sche Vus (mo sco burgais svizzer) lavurais en in stadi, cun il qual la Svizra n'ha betg fixà in contract d'assicuranza sociala, en il servetsch da la Confederaziun u d'ina organisaziun internaziunala ubain en in'organisaziun d'agid renconuschida da la Confederaziun, restais Vus assicurads en Svizra.
  • Sche Vus lavurais en in stadi, cun il qual la Svizra n’ha nagina cunvegna d’assicuranza sociala ed essas domiciliads a medem temp en Svizra, restais Vus assicurads en Svizra.
  • Sche Vus lavurais en in stadi cun il qual la Svizra ha ina cunvegna d’assicuranza sociala e mantegnais Voss lieu da domicil en Svizra, pudais Vus restar assicurads en Svizra, sche tut las premissas èn dadas.
  • Sche Vus bandunais la Svizra e giais en in stadi da la UE/AECL, pudais Vus restar assicurads tar la AVS/AI/UCG be en cas ordinaris (cf. fegl d’infurmaziun «Die Schweiz verlassen und in einen Mitgliedstaat der Europäischen Union (EU) oder der Europäischen Freihandelsassoziation (EFTA) ziehen»).
  • Vus giais a star en in stadi che n'appartegna betg a la UE/AECL En quest cas avais Vus la pussaivladad d'entrar en la AVS/AI facultativa. Resguardai en quest connex las indicaziuns qua sutvart sco er il fegl d'infurmaziun "10.01 - Lavurants a l'exteriur e lur confamigliars".

AVS / AI facultativa

Burgais svizzers sco er burgaisas e burgais da stadis da la UE/AECL che van a star en in pajais ordaifer la UE/AECL pon entrar en la AVS/AI facultativa. La cundiziun è ch'els èn stads assicurads durant ils ultims tschintg onns tar la AVS/AI/CG/ obligatorica. Els ston s'annunziar entaifer in onn tar ina represchentanza svizra (ambassada u consulat) ubain tar la Cassa svizra da cumpensaziun a Genevra e pajar contribuziuns en l'import da 9,8 % da lur entradas. Conjugals u partenarias u partenaris registrads che s'assicureschan facultativamain ston assicurar independentamain er lur uffants.

Sche Vus n’avais nagina activitad da gudogn, valan lur contribuziuns sco pajadas, premess ch'il conjugal u il partenari registrà cun activitad da gudogn haja pajà contribuziuns d'almain 1'844 francs per onn. Persunas assicuradas senza activitad da gudogn pajan ina contribuziun sin basa da la facultad e da l'entrada en furma da renta. La contribuziun minimala per l'assicuranza facultativa importa 922 francs per onn, la contribuziun maximala 23'050 francs per onn. Per ulteriurs detagls vesair il fegl d'infurmaziun "10.02 – Assicuranza facultativa per vegls, survivents ed invaliditad".

Fegliets infurmativs davart las assicuranzas socialas en il context internaziunal

Dumonda da restituziun da las contribuziuns a l'assicuranza sociala

Persunas estras, da las qualas cun ils stadis d'origin la Svizra n'ha betg fixà ina cunvegna davart las assicuranzas socialas, pon dumandar la restituziun da las contribuziuns pajadas a la AVS. E quai da la part dal lavurant sco er da la part dal patrun, dentant senza tschains. Per la restituziun da las contribuziuns a la AVS valan tschertas premissas che ston vegnir observadas.