Las autoritads svizras online

directamain tar il cuntegn

Dastg jau avair in'activitad da gudogn en la vegliadetgna da renta?

Er sche Vus avais cuntanschì la vegliadetgna da pensiun ordinaria, dastgais Vus avair vinavant in'activitad da gudogn. En quest cas pudais Vus suspender la retratga da la renta per almain 1 onn e per maximalmain 5 onns u retrair la renta malgrà Vossa activitad da gudogn. Las contribuziuns a la AVS che Vus pajais suenter che Vus avais cuntanschì la vegliadetgna da pensiun ordinaria, èn contribuziuns da solidaritad e n'han pli nagina influenza sin l'autezza da la renta.

Contribuziuns a la AVS

Sche Vus avais suenter Voss pensiunament vinavant in'activitad da gudogn, vegnan deducidas da Vossa paja vinavant las contribuziuns a la AVS, a la AI e las contribuziuns da cumpensaziun dal gudogn. Las contribuziuns a l'assicuranza cunter la dischoccupaziun crodan dentant, perquai che Vus n'avais nagin dretg pli d'ina indemnisaziun da dischoccupaziun en la vegliadetgna da pensiun.

Las contribuziuns vegnan incassadas sin la part da la paja che surpassa in import liber determinà (actualmain 1400 francs per mais resp. 16 800 francs per onn). Sche Vus lavurais per pliras patrunas e plirs patruns, vala l'import liber per mintgin da quests engaschaments.

Contribuziuns da la prevenziun professiunala

Normalmain cumenza la renta da la segunda pitga cur che la vegliadetgna da pensiun ordinaria è vegnida cuntanschida. Las instituziuns da prevenziun pon dentant suspender il pajament da la renta fin a la cumplenida dal 70avel onn da vegliadetgna. Durant quest temp na vegnan incassadas da princip naginas contribuziuns pli per la segunda pitga: Voss dabun da vegliadetgna na s'augmenta betg, malgrà la prolungaziun da l'activitad da gudogn. Percunter s’augmenta l’uschenumnada tariffa da conversiun da la renta e per consequenza la renta. As drizzai a Vossa cassa da pensiun.