Las autoritads svizras online

directamain tar il cuntegn

Gravidanza – prestaziuns da la cassa da malsauns

Ils custs vegnan surpigliads – senza franschisa e senza resalva persunala

Sche Vus essas en speranza, paja la cassa da malsauns ils custs da las visitas da controlla, da la naschientscha, da la controlla posteriura e da la cussegliaziun per mammas che tezzan. Vus na stuais betg As participar als custs, sche Vus essas en speranza. Vus na pajais pia ni la franschisa ni la resalva persunala ni ina contribuziun als custs da dimora a l’ospital. Ils custs per la naschientscha en l'ospital, en la chasa da parturir u a chasa vegnan surpigliads. Tar las visitas da controlla che vegnan pajadas tutgan duas analisas ad ultrasun tar ina gravidanza normala sco er il test da l’emprim trimester per eruir la ristga d’ina trisomia 21, 18 u 13 sco er il test prenatal betg invasiv (NIPT) en cas d’ina gronda ristga da trisomia. En cas d'ina ristga pli gronda vegn pajada la controlla da l'aua da la vaschia (amniozentesa) e la controlla da la placenta (corionbiopsia). En cas d’ina gravidanza a ristga vegnan ils custs da las controllas surpigliads sin fundament dal giudicament clinic.

Remartgai per plaschair

  • Cumplicaziuns entaifer l’emprima fin la fin da la 12avla emna da gravidanza valan sco malsogna. Durant questa perioda da la gravidanza sto la dunna sa participar als custs.
  • A partir da la 13avla emna da gravidanza fin otg emnas suenter la naschientscha na ston las dunnas betg pli sa participar als custs en cas da cumplicaziuns u da malsognas.
  • Sche l'ospital u la chasa da parturir che Vus avais elegì n'è betg sin la glista dal chantun da domicil, stuais Vus As infurmar tar Vossa cassa da malsauns, sch'ils custs vegnan surpigliads.
  • L'assicuranza da malsauns sa participescha als custs da curs per preparar la pagliola mo, sch'els vegnan manads d'ina spendrera u d’ina organisaziun da spendreras.

Ils custs d'ospital per il poppin

La dimora dal poppin a l'ospital ensemen cun sia mamma vegn pajada da la cassa da malsauns da la mamma, medemamain senza la franschisa, senza la resalva persunala e senza ina contribuziun als custs da dimora a l’ospital. Sch'il novnaschì vegn dentant malsaun e sto ir a l’ospital, surpiglia la cassa da malsauns da l'uffant ils custs ed i vegn applitgada la participaziun als custs (resalva persunala).

Prestaziuns en cas da maternitad e da naschientscha

Glistas chantunalas dals ospitals