Sche Vus essas maridada u maridà, avais Vus e Voss consort u Vossa consorta automaticamain la tgira genituriala cuminaivla per ils uffants cuminaivels, e quai a partir da la naschientscha dals uffants.
Sche Vus n’essas betg maridada u maridà, pudais Vus preschentar a l'uffizi da stadi civil – a chaschun da la renconuschientscha da l’uffant – ina decleraziun cuminaivla davart la tgira genituriala. Questa decleraziun pudais Vus er consegnar gia avant la naschientscha. Sche Vus vulais surpigliar la tgira genituriala pli tard, stuais Vus far ina dumonda a l'Autoritad per la protecziun d’uffants e da creschids (APUC).
Sche Vus n’essas betg maridada u maridà e sch’in genitur refusa la tgira genituriala cuminaivla, vegn la tgira genituriala concedida a la mamma tar la naschientscha da l’uffant. Il genitur che vul la tgira genituriala cuminaivla sto sa drizzar a la APUC dal lieu da domicil da l’uffant. L’autoritad decida a favur da la tgira genituriala cuminaivla, sch’il bainstar da l’uffant n’è betg periclità.
Per regla vala la tgira genituriala cuminaivla er suenter il divorzi. La dretgira che pronunzia la sentenzia attribuescha il dretg da tgira ad in sulet genitur mo, sch’ella considerescha quai sco necessari per il bainstar da l’uffant.
Sche Vus exequis la tgira genituriala, avais Vus differentas obligaziuns. En spezial stuais Vus prender decisiuns impurtantas per il svilup da Voss uffants, s’occupar da lur svilup ed administrar lur facultad.
Per decisiuns che pertutgan Voss uffants stuais Vus resguardar uschenavant sco pussaivel l’opiniun da Voss uffants, e quai tegnend quint da lur vegliadetgna.
La tgira genituriala cuminaivla na vul betg dir automaticamain che Vus essas tuts dus responsabels per avair quità da Voss uffants en cas d’ina separaziun.
Vus e Voss uffants pon dentant dumandar l’autoritad responsabla d’examinar, sch’ina tgira alternanta è pussaivla. Inoltrai Vossa proposta ad ina dretgira da divorzi u – sche Vus n’essas betg maridada u maridà – a la APUC.
Er sche la tgira genituriala n’è betg vegnida concedida a Vus, avais Vus tuttina il dretg d’avair ina relaziun persunala cun Voss uffants e da vegnir infurmada u infurmà davart eveniments spezials en lur vita. Vus avais per exempel il dretg da survegnir infurmaziuns da las persunas d’instrucziun, da la media u dal medi da Voss uffants.
Ulteriuras infurmaziuns necessarias chattais Vus qua: