Tschertga

Al cuntegn
Siglia al cuntegn da la paginaSiglia a la navigaziunSiglia a la tscherna da la linguaSiglia a la tscherna da la linguaRespostas simplas davart la vita en Svizra
  • DE
  • FR
  • IT
  • RM
  • EN
Respostas simplas davart la vita en Svizra
  • Tut ils temas
  • Famiglia e partenadi
  • Maridaglia, concubinat, partenadi
  • Partenadi da pèrs da la medema schlattaina
  • Annullaziun d’in partenadi registrà
Tut ils temas
  • Famiglia e partenadi
  • Maridaglia, concubinat, partenadi
  • Partenadi da pèrs da la medema schlattaina
  • Annullaziun d’in partenadi registrà

Annullaziun d’in partenadi registrà

Per l’annullaziun d’in partenadi registrà stuais Vus proceder sumegliantamain ad in divorzi. Er las consequenzas da l’annullaziun sa laschan cumparegliar cun las consequenzas d’in divorzi.

Actual

Ils 26 da settember 2021 han las burgaisas svizras ed ils burgais svizzers approvà la Lètg per tuts en ina votaziun dal pievel. Pèrs omosexuals pon maridar a partir dal 1. da fanadur 2022. Ultra da quai po in partenadi registrà existent vegnir transfurmà a partir da questa data en ina lètg. In partenadi registrà percunter na vegn a partir da quest mument betg pli ad esser pussaivel.
Tut ils temas
  • DE
  • FR
  • IT
  • RM
  • EN
Per l’annullaziun d’in partenadi registrà dovri la sentenzia d’ina dretgira civila.
En Svizra sa differenziescha l’organisaziun da las dretgiras tut tenor il chantun. Sche Vus n’essas betg segira u segir a tge dretgira che Vus As stuais drizzar, As infurmai tar l’autoritad da giustia chantunala ubain tar in’advocata u in advocat da Vossa tscherna.

Sche tuts dus èn d’accord

Sche Vus e Vossa partenaria u Voss partenari essas d’accord cun l’annullaziun dal partenadi, As drizzai a la dretgira responsabla da Voss chantun da domicil.
Vus stuais inoltrar ils suandants documents a la dretgira:

  1. Ina dumonda en scrit suttascritta d’omaduas persunas. Dretgiras porschan savens formulars u models correspundents.

  2. Ina cunvegna d’annullaziun, quai vul dir in document en scrit, nua che Vus fixais co che Vus vulais vegnir a frida cun las consequenzas da la separaziun. Tranter auter sa tracti da las suandantas dumondas: Co vegn repartida la facultad? Tgi resta en l’abitaziun fittada cuminaivlamain? Tgi survegn l’abitaziun acquistada cuminaivlamain? En cas da figliastras e figliasters: Dastga l’autra partenaria u l’auter partenari vesair e visitar els vinavant?

Sche Vus n’essas betg perina en tuts puncts, pudais Vus tuttina inoltrar la dumonda d’annullaziun a la dretgira e surlaschar ad ella la decisiun pertutgant las dumondas dispitadas.
La dretgira responsabla po pretender ulteriurs documents.
La procedura per l’annullaziun dal partenadi registrà sa drizza confurm al senn tenor las disposiziuns davart la procedura da divorzi.

Sche Vus na vegnis betg perina

Il partenadi registrà po er vegnir annullà cunter la voluntad d’ina partenaria u d’in partenadi.
Sch’il pèr viva dapi in onn separadamain, po la persuna che vul annullar il partenadi inoltrar ina dumonda correspundenta a la dretgira responsabla. 
La procedura per l’annullaziun dal partenadi registrà sa drizza confurm al senn tenor las disposiziuns davart la procedura da divorzi.

  • Stadi civil: Suenter l’annullaziun dal partenadi è Voss stadi civil «partenadi annullà».

  • Separaziun dals bains: En in partenadi registrà vala per il solit la separaziun dals bains: En cas d'ina annullaziun da quest partenadi salva damai mintga persuna quai ch’ella posseda. Tgi che surpiglia ils bains acquistads cuminaivlamain, indemnisescha l’autra persuna cun ina summa da daners. Observai: Sche Vus e Vossa anteriura partenaria u Voss anteriur partenari avais transferì Vossas valurs da facultad cun in contract da facultad en la cuminanza, stuais Vus parter quellas.

  • Pajaments da mantegniment: Suenter l’annullaziun dal partenadi registrà è mintga persuna responsabla per ses agen mantegniment. In dretg d’aliments po dentant vegnir concedì, sch’ina persuna ha reducì u terminà cumplettamain sia activitad da gudogn pervia la repartiziun da las incumbensas. Il dretg d’aliments resta en vigur, fin che la persuna che survegn ils pajaments da mantegniment po puspè procurar sezza per ses mantegniment.

  • Taglia: Suenter l’annullaziun dal partenadi vegnan omaduas persunas puspè suttamessas separadamain a la taglia.

  • AVS e provediment professiunal: Omaduas partenarias u omadus partenaris survegnan mintgamai la mesadad da la summa da l’assicuranza per vegls e survivents (AVS) e da la cassa da pensiun ch’è vegnida acquistada durant il partenadi.

  • Uffants: Sch’ina partenaria u in partenari ha uffants, po la dretgira definir che l’autra persuna dastgia tgirar contact persunal cun las figliastras ed ils figliasters er anc suenter la separaziun.

  • Ierta: Cun l’annullaziun dal partenadi perdan las duas persunas il dretg da l’ierta da la partenaria u dal partenari. Da resguardar: Sche Vus avais adoptà l’uffant da Vossa partenaria u da Voss partenari (adopziun dal figliaster), vegnan las dumondas d’uffants regladas tenor las disposiziuns dal dretg da divorzi. En quest cas exista in dretg d'in contact persunal tranter Voss uffant e Vus.

Per infurmaziuns specificas davart la procedura d’annullaziun e davart ils custs pudais Vus As drizzar ad in’advocata u ad in advocat ubain ad ina notara u ad in notar da Vossa tscherna.
Il fegl d’infurmaziun davart la constituziun d’in partenadi registrà cuntegna ulteriuras infurmaziuns utilas per il cas che Vus vulais annullar il partenadi registrà (effects sin la facultad, sin l’ierta e.u.v.).
Tut ils temas

In servetsch da la Confederaziun, dals chantuns e da las vischnancas

Davart ch.chInfurmaziuns giuridicas
Link YoutubeLink Twitter
VoteInfo