Sche Vus vulais As laschar divorziar, As drizzai a la dretgira responsabla en Voss chantun da domicil.

Sche Vus e Vossa conjugala u Voss conjugal essas d’accord cun il divorzi, pudais Vus inoltrar ina dumonda cuminaivla da divorzi (“divorzi sin dumonda cuminaivla”) cun ils suandants documents:

• In document suttascrit da tuts dus (brev u formular), nua che Vus exprimis Vossa voluntad da sa laschar divorziar. Vus na stuais betg inditgar las raschuns per il divorzi.

• In document, nua che Vus descrivais las consequenzas dal divorzi, davart las qualas Vus essas vegnids perina (cunvegna da divorzi): la schliaziun da l'urden dals bains, la partiziun dal provediment professiunal, il dretg da tgira dals uffants, la contribuziun da mantegniment, l’abitaziun e.u.v.

La dretgira po pretender ulteriurs documents.

Il proceder finescha cun la sentenzia da divorzi da la dretgira. La dretgira fixescha las consequenzas per Vus, per Vossa anteriura conjugala u Voss anteriur conjugal e per Voss uffants. Ella resguarda las propostas da Vossa cunvegna da divorzi, nun che quella na saja betg equilibrada (per exempel sche Vus renunziais – perquai che Vus vulais dumagnar uschè svelt sco pussaivel il divorzi – a las pretensiuns da provediment che Vus avais acquistà durant la lètg) u sch’ella cuntrafa als interess dals uffants. Quai è per exempel il cas, sche Vus renunziais als pajaments da mantegniment da l'anteriura conjugala u da l'anteriur conjugal per survegnir suletta u sulet il dretg da tgira.

Vus pudais er dumandar il divorzi, sche Vossa conjugala u Voss conjugal n’è betg d’accord. Vus stuais dentant avair vivì separadamain durant almain dus onns.

En cas excepziunals po ina lètg vegnir divorziada avant la scadenza da quest termin da separaziun da dus onns. Premess vegni dentant che la lètg saja daventada insupportabla per Vus per motivs gravants, p.ex. en cas da violenza corporala.

La dretgira infurmescha davart ils documents che Vus stuais preschentar.
La procedura finescha cun la sentenzia da divorzi da la dretgira. La dretgira decida davart tut las consequenzas dal divorzi. En quest connex resguarda ella ils puncts, nua che Vus e Vossa anteriura conjugala u Voss anteriur conjugal essas tuttina anc vegnids perina.

La durada d’ina procedura da divorzi è differenta. Sche Vus e Vossa conjugala u Voss conjugal essas d’accord davart las consequenzas dal divorzi, dura quai per regla trais fin quatter mais. Sche Vus na vegnis betg d'As cunvegnir davart ina u pliras consequenzas, po ina procedura da divorzi durar plirs onns.