Suenter il divorzi pudais Vus da tut temp puspè surpigliar Voss num da nubil u il num che Vus avevas avant las nozzas. Per quai tanscha ina dumonda a l’uffizi da stadi civil da Voss domicil.
N’emblidai en quest cas betg da laschar midar Voss documents uffizials – en spezial il passaport, la carta d’identitad ed il permiss da manischar.
Resguardai:
Vossa anteriura conjugala u Voss anteriur conjugal n'As po betg sfurzar da midar il num. Il divorzi n’ha nagina influenza sin il num da Voss uffants.
En cas d’in divorzi è il dretg da tgira cuminaivel la norma. La dretgira che tira la sentenzia da divorzi attribuescha il dretg da tgira ad in genitur sulet mo en cas ch’ella resguarda quai sco necessari per il bainstar da l’uffant.
Er sche Vus surpigliais ensemen la tgira genituriala, na vul quai betg dir automaticamain che omadus hajan (alternantamain) la tgira da lur uffants. Dapli davart la tgira genituriala dals uffants vegnis Vus a savair sin la pagina davart il dretg da tgira.
Tras il divorzi vegnan er la facultad ed ils debits repartids sin tuttas duas partidas. Quest process numnan ins liquidaziun dals bains matrimonials. Questa repartiziun dependa da l’urden dals bains ch’ins ha tschernì a chaschun da las nozzas.
Per infurmaziuns detagliadas davart la liquidaziun dals bains matrimonials e davart la repartiziun da las pretensiuns ord la AVS (1. pitga) ed ord il provediment professiunal (2. pitga) As drizzai ad in’advocata u ad in advocat ubain a Vossa cassa da cumpensaziun da la AVS
Mantegniment da l'anteriura conjugala u da l'anteriur conjugal
Suenter il divorzi stuais Vus e Vossa anteriura conjugala u Voss anteriur conjugal finanziar Voss agen mantegniment.
Tut tenor vegliadetgna, la durada dal matrimoni, la repartiziun da las incumbensas famigliaras durant il matrimoni (per exempel sch'ina u in da Vus ha chalà da lavurar per s’occupar dals uffants) e cunzunt tenor la situaziun finanziala pudess ina u in da Vus vegnir obligada u obligà da pajar pajaments da mantegniment almain durant in tschert temp.
Vus pudais As cunvegnir cuminaivlamain cun Vossa anteriura dunna u cun Voss anteriur um davart l’autezza da la contribuziun. Sche quai n’è betg pussaivel, decida la dretgira da divorzi.
Resguardai che Vus perdais il dretg dals pajaments da mantegniment, sche Vus maridais puspè.
Mantegniment dals uffants
L’obligaziun da finanziar il mantegniment dals uffants dura fin ch'els èn maiorens u fin ch'els han terminà lur scolaziun. Tut tenor lur pussaivladads procuran ils geniturs cuminaivlamain per il mantegniment dals uffants.
Vus pudais As cunvegnir cun Vossa anteriura dunna u cun Voss anteriur um davart l'autezza da la contribuziun.
La decisiun definitiva vegn prendida da la dretgira. Latiers resguarda ella ils basegns dals uffants e la situaziun finanziala da tuts dus anteriurs conjugals.
En cas che Vossa anteriura dunna u Voss anteriur um na paja betg las contribuziuns da mantegniment fixadas da la lescha, pudais Vus dumandar agid d'ina advocata u d'in advocat ubain dal chantun, per motivar ella u el da resguardar questa obligaziun. Per quai dispona mintga chantun d'ina u da pliras centralas d’incasso. Quellas As gidan ad incassar ils daners che Vus avais dabun. Almain per las contribuziuns da mantegniment per Voss uffants è quest agid gratuit.
Sut tschertas premissas pon ils chantuns pajar anticipadamain ina part u tut las contribuziuns da mantegniment per ils uffants. Uschia per exempel sch'il salari dal genitur che tgira ils uffants na basta betg per finanziar sulet lur mantegniment.
As infurmai tar Vossa vischnanca da domicil davart las pussaivladads da survegnir – en Voss chantun – in pajament anticipà da las contribuziuns da mantegniment sco er sustegn per incassar questas contribuziuns.
Sche Vus possedais ina legitimaziun C, dastgais Vus restar en Svizra er suenter il divorzi.
Sche Vus avais percunter survegnì – en il rom d’ina reuniun da la famiglia – ina legitimaziun B, dastgais Vus restar en Svizra mo sut tschertas premissas. Infurmaziuns detagliadas davart quest tema chattais Vus sin la pagina Permissiuns da dimora per la Svizra.
Per infurmaziuns detagliadas davart las consequenzas dal divorzi As drizzai ad in’advocata u ad in advocat ubain a la dretgira responsabla dal chantun, nua che la dretgira vegn exequida.
Infurmaziuns utilas davart las consequenzas dal divorzi per il provediment professiunal chattais Vus er en il mussavia Provediment professiunal en cas da divorzi. In mussavia per pèrs maridads e per pèrs registrads.