Las autoritads svizras online

directamain tar il cuntegn

Examen pratic da manischar

Durant l'examen pratic giuditgescha in expert, sche Vus essas abel da manischar in vehichel a motor da la categoria correspundenta en moda segira ed observond las reglas da traffic. Per s'acquistar las cumpetenzas las pli impurtantas e per sa preparar per l'examen, vegni recumandà da prender lecziuns da manischar tar ina scolasta u in scolast da manischar.

Annunzia

Sche Vus As sentis segir da manischar in vehichel a motor, essas scolà avunda en il traffic sin via ed avais absolvì ils curs obligatorics (instrucziun da traffic e.u.v.), As pudais annunziar per l'examen pratic da manischar.

Scolasta u scolast da manischar en Vossa vischinanza

Pretensiun per l’examen

Per l'examen pratic da manischar vegn pretendì per mintga categoria il vehichel d'examen correspundent che sto esser en in stadi en urden per il traffic, sto correspunder a las prescripziuns e sto esser munì da la vart davos ad in lieu bain vesaivel cun ina tavla blaua che cuntegna in «L» alv.

  • il passaport, la carta d’identitad u la permissiun da dimora;
  • il permiss dad emprender dad ir cun auto;
  • il permiss da manischar, sche Vus essas gia en possess d’in tal per autras categorias da vehichels;
  • il document dal vehichel d’examen.

Sche Vus passais l’examen

Sche Vus avais fatg cun success l'examen da manischar, survegnis Vus il permiss da manischar sin emprova en il format da carta da credit (PCC) per posta.

Sche Vus na passais betg l’examen

Per l’emprima giada

Suenter in mais pudais Vus per regla repeter l’examen, sche Vus n’essas betg passads. As infurmai en quest cas tar l’uffizi per il traffic sin via da Voss chantun da domicil.

Per la segunda giada

Sche Vus na passais betg l’examen per la segunda giada, stuais Vus prender cun Vus in attest dad ina scolasta u d’in scolast da manischar, che demussa che Vus avais finì la scolaziun.

Per la terza giada

Sche Vus crudais tras l’examen pratic per la terza giada, stuais Vus far in test da qualificaziun, per pudair far in ulteriur examen. L’uffizi per il traffic sin via da Voss chantun As renviescha al post correspundent. Sch'il test da qualificaziun è negativ, scada la validitad dal permiss per emprender a manischar. La basa giuridica correspundenta è l’Ordinaziun davart l’admissiun al traffic.

Per la quarta giada

Sche Vus na reussis er per la quarta giada betg l’examen da manischar u sch'il test da qualificaziun suenter il terz examen è negativ, pudais Vus absolver in ulteriur examen mo sin fundament d'ina positiva expertisa psicologica areguard il traffic.

Infurmaziuns davart l’uffizi per il traffic sin via da Voss chantun

Custs

Ils custs da l'examen pratic varieschan da chantun a chantun. As infurmai per plaschair tar l'uffizi per il traffic sin via da Voss chantun da domicil.