Las autoritads svizras online

directamain tar il cuntegn

Chaussas impurtantas per la decleraziun da taglia

Mintga onn ston tut ils pajataglias da la Svizra emplenir ed alura inoltrar lur decleraziun da taglia. Quai pon els far a maun, cun ina software speziala u directamain en l'internet.

Tge documents dovrel jau?

Ina buna preparaziun facilitescha ed accelerescha la lavur d'emplenir la decleraziun da taglia. I vegn cusseglià da rimnar e da tegnair a disposiziun ils suandants documents, avant che cumenzar ad emplenir respectivamain gia durant l'onn:

  • attest da salari
  • extracts dal conto da banca u da posta
  • mussaments davart las vaglias
  • mussaments da las contribuziuns a favur da la pitga 3a (prevenziun voluntara)
  • mussaments da pajaments spezials a favur da la 2. pitga (Cassa da pensiun tenor LPP; las contribuziuns regularas èn cumprovadas sin l'attest da salari)
  • survista dals custs da malsogna
  • survista dals custs professiunalsmussaments da furmaziuns supplementarasmussaments da donaziuns
  • proprietari(a)s d'abitaziuns e da chasas: tut ils documents davart la taglia sin immobiglias, ils tschains da debits, ils quints per lavurs da mantegniment e da renovaziun, ils custs da manaschi e d'administraziun e.u.v.

Cussegls

  • Examinai exactamain, tge che Vus pudais deducir – il mussavia infurmescha
  • Inoltrai mo ils mussaments e las confermas ch'èn explicitamain dumandads ensemen cun la decleraziun da taglia – ils ulteriurs mussaments stuais Vus mo tegnair a disposiziun per in eventual scleriment tras l'autoritad da taglia.
  • Conjugals empleneschan communablamain ina decleraziun da taglia – omadus conjugals la ston suttascriver.
  • Na spetgai betg fin a l'ultim termin per inoltrar la decleraziun da taglia – la taxaziun definitiva vegn ad esser pussaivla tant pli baud ed ils quints en ratas pon vegnir preparads en moda pli precisa.
  • Profitai da l'occasiun per emplenir la decleraziun da taglia cun ina software u directamain en l'internet.

Deducziuns

Las leschas da taglia permettan divers geners da deducziuns. Las deducziuns sco er lur import varieschan da chantun a chantun. Tge custs pon vegnir deducids?

  • Custs per realisar il gudogn (custs che vegnan impundids per realisar in'entrada, sco ils custs dal viadi al lieu da lavur, ils custs supplementars per l'alimentaziun e.u.v.).
  • Deducziuns generalas sco las contribuziuns a la AVS, a la AI, a la prevenziun, a las assicuranzas da malsauns e da vita, deducziuns per la tgira d'uffants tras terzas persunas, donaziuns ad instituziuns cun intents d'utilitad publica sco er tschains da debits privats.
  • Deducziuns socialas sco la deducziun per uffants, la deducziun persunala, sco er la deducziun per persunas che dovran sustegn.
  • Debits che resultan pon vegnir deducids da la facultad.

Emplenir la decleraziun da taglia directamain en l'internet:

Las administraziuns chantunalas da taglia èn cumpetentas per la decleraziun da taglia e mettan a disposiziun la software resp. la plattafurma necessaria.

Conservar actas da taglia

Tut tenor taglia e chantun ston las decleraziuns da taglia, las quittanzas ed ils documents da taglia vegnir conservads cun differentas duradas. As infurmai tar Vossa administraziun da taglia davart ils exacts termins da surannaziun. Per esser fitg segir, conservai ils documents fin 15 onns suenter che la perioda da taglia è scrudada.