Empleni mai il cedel da votar u electoral per insatgi auter. Quai vala numnadamain sco «chatscha sin vuschs» ed è scumandà. Vus ristgais ina multa. L'unica excepziun: En tscherts chantuns dastgais Vus emplenir il cedel da votar per in'autra persuna, sche quella è duraivlamain inabla da scriver. Tge che Vus stuais resguardar en quest connex, variescha tut tenor il chantun.
Da chatscha sin vuschs sa tracti er, sch'insatgi rimna, emplenescha u mida sistematicamain cedels electorals u da votar u distribuescha tals cedels.
Tgi che falsifitgescha resultats d'elecziuns u da votaziuns u violescha il secret d'elecziun e da votaziun, sto quintar cun in chasti pecuniar u cun in chasti da detenziun da fin 3 onns. Furmas da falsificaziun u da corrupziun èn per exempel:
Falsifitgar il register electoral
Sa participar ad in'elecziun u ad ina votaziun dastgan mo persunas ch'èn inscrittas en il register electoral d'ina vischnanca. Tgi che falsifitgescha u destruescha il register electoral, sa fa chastiabel.
Engular material electoral
Tgi che engola il material electoral u da votar d'ina autra persuna ed elegia u votescha cun quest material, sa fa chastiabel.
Attenziun cun midar chasa
Sche Vus giais ad abitar en in auter lieu, survegnis Vus en cas excepziunals il material da votar da la veglia e da la nova vischnanca. Tuttina dastgais Vus votar u eleger mo en in lieu. Tramettai enavos a la veglia vischnanca da domicil il material electoral che Vus avais survegnì da memia.
Corrupziun
Tut las persunas cun dretg da votar ston pudair decider libramain, co ch'ellas vulan votar e tgi ch'ellas vulan eleger – e sch'ellas vulan insumma sa participar ad ina votaziun u ad in'elecziun. Perquai scumonda il Cudesch penal la corrupziun: Tgi che paja insatgi u sa lascha pajar, per ch'el voteschia u elegia en ina tscherta moda, u per ch'el sa participeschia insumma a l'elecziun u a la votaziun, sa fa chastiabel. Il medem vala en connex cun regals sco er cun violenza u cun smanatschas.
Manipulaziun d'elecziuns
Las vuschs ston vegnir registradas e dumbradas correctamain. La lescha scumonda explicitamain d'agiuntar, da laschar davent, da midar u da dumbrar faussamain cedels da votar en biros electorals u da votaziun. Igl è er scumandà explicitamain da documentar faussamain il resultat d'ina elecziun u d'ina votaziun.
Secret da votaziun
Sche Vus chattais ora en moda illegala, co ch'insatgi ha votà u elegì, As faschais Vus chastiabel. Percunter dastgais Vus dir, co che Vus sezza u sez avais votà u elegì.
En cas d'irregularitads pon las autoritads far sezzas ina denunzia. Ma er Vus sco persuna privata pudais inoltrar a bucca u en scrit ina denunzia ad in post da polizia. Vus pudais er infurmar la Procura publica.