En las medias
En Svizra èsi scumandà da far reclama politica al radio ed a la televisiun. En las autras medias dastgan ins percunter far reclama politica.
Ina gasetta po refusar da publitgar in inserat politic. Tenor il Cussegl svizzer da la pressa, l'instanza da recurs en connex cun las medias, po la gasetta far valair motivs etics. In inserat politic sto plinavant sa differenziar cleramain d'ina contribuziun schurnalistica.
Cun il material electoral
Differents chantuns permettan da trametter reclama electorala ensemen cun il material electoral uffizial.
As infurmai tar la vischnanca, sche Vus vulais far ina campagna en il spazi public (stans, manifestaziuns e.u.v.). La vischnanca As inditgescha, tge ch'è permess en tge lieu e da tge temp. Savens duvrais Vus ina permissiun.
- Nagins resultats
Tut las reclamas che pudessan periclitar la segirezza dal traffic, èn scumandadas. Las premissas per reclamas per lung da las vias èn regladas per l'entira Svizra en l'Ordinaziun davart la signalisaziun da las vias. Ultra da quai valan eventualmain reglas chantunalas u communalas.
Radio e televisiun
La Societad svizra da radio e televisiun (SSR) è la purschidra dal service public audiovisual. Avant las elecziuns ed avant las votaziuns sto la SSR concepir il program uschia, che l'egualitad da las schanzas da las candidatas e dals candidats e dals champs politics è garantida. Il program sto ademplir las pretensiuns da l'objectivitad e da la diversitad.
En cas da reclamaziuns pudais Vus As drizzar al Servetsch da mediaziun da la SSR. En in segund pass As drizzais Vus a l'Autoritad independenta da recurs davart radio e televisiun (AIRR).
Er ils emetturs da radio e da televisiun privats ston observar las reglas. Uschia ston las emissiuns d'infurmaziun per exempel preschentar ils eveniments confurm a la vardad.
Autras medias
Las autras medias – privatas – han ina gronda libertad giuridica. Ils criteris etics ch'ellas sezzas u il Cussegl svizzer da la pressa fixeschan, èn perquai da gronda impurtanza. Mintga persuna po far recurs tar il Cussegl svizzer da la pressa. Bain na po il Cussegl da la pressa pronunziar nagins chastis. Tuttina è sia posiziun d'in grond interess per la publicitad.
Brevs da lecturs e forums da discussiun
Er durant ils cumbats electorals e da votaziun n'èn las medias betg obligadas da stampar ina brev da lecturs u da publitgar in commentari online. Las medias pon schizunt vegnir chastiadas, sch'ellas publitgeschan cuntegns rassistics u disfamants. La redacziun ha il dretg da scursanir brevs da lecturs.
Las prescripziuns legalas valan er per las raits socialas e per l'internet. Durant las campagnas electoralas èn permessas bleras chaussas. Per exempel n'èsi betg scumandà dal tuttafatg da derasar intenziunadamain faussas infurmaziuns (fake news).
Las retschertgas da l'opiniun publica davart votaziuns e davart elecziuns n'èn betg regladas specificamain en Svizra. La branscha fixescha sias atgnas reglas. 10 dis avant las votaziuns ed avant las elecziuns na vegnan normalmain publitgads nagins resultats da retschertgas d'opiniuns pli.
Il Cussegl svizzer da la pressa è l'instanza da recurs en connex cun las medias.
L'Ordinaziun davart la signalisaziun da las vias regla las reclamas per lung da las vias.
La Lescha federala davart radio e televisiun fixescha il rom per il cuntegn dals programs.
Il Servetsch da mediaziun da la SSR tracta ils recurs cunter la SSR.
L'Autoritad independenta da recurs davart radio e televisiun (AIRR) prenda decisiuns liantas.