Las autoritads svizras online

directamain tar il cuntegn

Inoltrar ina dumonda d'asil

Sche Vus vegnis smanatschads en Vossa patria (u en il pajais, nua che Vus avais abità sco ultim) pervi da Vossa razza, religiun u naziunalitad u sche Vus stuais temair da perder Vossa libertad, avais Vus la pussaivladad da dumandar asil en Svizra. In ulteriur motiv per inoltrar ina dumonda d'asil pon esser Vossas opiniuns politicas u l'appartegnientscha ad ina gruppa sociala.

Ina dumonda d'asil po vegnir inoltrada a bucca u en scrit ad in post da cunfin avert, tar ina controlla da cunfin en ina plazza aviatica svizra u ad in center d'accoglientscha e da procedura per requirents d'asil. Ina dumonda po mo vegnir inoltrada al cunfin svizzer u sin il territori da la Svizra.

Per la dumonda d'asil na valan naginas prescripziuns formalas spezialas, ma la dumonda duess – sche pussaivel – adina vegnir cumplettada cun cumprovas davart la smanatscha u davart la persecuziun. Sche la dumonda vegn inoltrada a chaschun dal passagi dal cunfin, infurmeschan ils posts da cunfin dal Secretariat da stadi per migraziun (SEM).

Consequenzas da la procedura da Dublin

Ils stadis associads a la cunvegna da Dublin fixeschan, tge stadi ch'è responsabel per examinar ina dumonda d'asil. Uschia vegni evità ch'in requirent d'asil po dumandar asil en plirs pajais. Stadis commembers da la procedura da Dublin èn ils stadis da l'Uniun europeica sco er la Norvegia, l'Islanda, il Liechtenstein e la Svizra.

Indicaziuns detagliadas dal SEM per inoltrar ina dumonda d'asil

Adressas dals centers d'accoglientscha e da procedura en Svizra