Il dossier electronic dal pazient (DEP) è ina collecziun digitala da Vossas datas da sanadad. El n'è dentant betg in rapport medical cumplet.
Cun il DEP pudais Vus deponer las infurmaziuns davart Vossa sanadad en in lieu e las metter a disposiziun facilmain e svelt a Vossas medias e medis sco er ad autras persunas spezialisadas dal sectur da sanadad. Quai meglierescha la coordinaziun e la qualitad da Voss tractaments.
En il DEP vegnan rimnads differents documents ch'èn relevants per la sanadad. Las persunas spezialisadas dal sectur da sanadad ed er Vus pudais deponer là infurmaziuns.
Per exempel pon persunas spezialisadas dal sectur da sanadad deponer en il DEP ils suandants documents:
Vossa glista da medicaments actuala
Rapport da sortida da l'ospital suenter in'operaziun
Rapport da radiografia
Rapport davart in'analisa ginecologica ad ultrasun
Attest da vaccinaziun
Indicaziuns davart allergias enconuschentas
Recepts medicals
Per exempel pudais Vus deponer en Voss DEP ils suandants documents:
Attest da la gruppa da sang
Attest da donatur d'organs
Disposiziun dal pazient
Diari da las dolurs
Rapports da radiografia u da labor ch'èn vegnids redigids avant l'avertura da Voss DEP
Il DEP cuntegna mo copias; las instituziuns da sanadad salvan ils originals.
Sche Vus abitais en Svizra ed avais pli che 16 onns (u 18 onns, tut tenor il purschider), pudais Vus avrir in DEP – ed er puspè serrar quel da tut temp e senza motivaziun.
Sco genitur pudais Vus avrir in DEP per Voss uffant immediat suenter sia naschientscha. Cun 16 onns (u 18 onns, tut tenor il purschider) survegn Voss uffant in agen login.
Vus pudais fixar ina represchentanza che administrescha Voss DEP per Vus: ina commembra u in commember da la famiglia, ina persuna parenta u ina persuna spezialisada dal sectur da sanadad.
Er sche Vus sco Svizra u Svizzer abitais u lavurais a l'exteriur, pudais Vus avrir in DEP.
Sco emprim stuais Vus tscherner in purschider dal DEP certifitgà. N'emporta betg per tge purschider che Vus As decidais: Il DEP funcziuna en l'entira Svizra.
Tar la gronda part dals purschiders èsi pussaivel d'avrir il dossier dal pazient online u directamain al lieu, per exempel en l'apoteca u en l'ospital.
Per avrir in DEP duvrais Vus particularmain:
Voss numer AVS
in'adressa dad e-mail
in document d'identitad
Durant il process d'avertura stuais Vus crear ina identitad electronica certifitgada.
La plattafurma d'infurmaziun uffiziala dal DEP As infurmescha detagliadamain davart il process d'avertura.
Vus decidais, tge persunas spezialisadas dal sectur da sanadad che han invista da tge documents da Voss DEP per quant ditg. Vus pudais p.ex. parter las datas cun Voss medi da chasa, cun ina media spezialista u cun Voss fisioterapeut.
Vus pudais er conceder il dretg d'access ad ina gruppa da persunas spezialisadas dal sectur da sanadad, p.ex. ad ina partiziun d'ospital, ina pratica da medi, ina chasa da tgira, in'apoteca u ad in servetsch da tgira ambulant.
Persunas ed organisaziuns che n'èn betg involvidas en Voss tractament, n'han betg access a Voss DEP. Patruns, assicuranzas u autoritads na pon pia betg consultar ils documents ch'èn arcunads là.
Vus fixais in stgalim da confidenzialitad per mintga document en il DEP e determinais uschia, tgi che dastga consultar tal e tgi betg. En in cas medicinal d'urgenza han las persunas spezialisadas dal sectur da sanadad access a Voss DEP, premess che Vus n'hajas betg bloccà l'access d'urgenza.
Sch'ina persuna spezialisada dal sectur da sanadad prenda – en cas d'urgenza – invista da documents da Voss DEP, survegnis Vus ina communicaziun automatica, p.ex. per e-mail u SMS.
Intginas persunas spezialisadas dal sectur da sanadad n'utiliseschan anc betg il DEP e n'han pia nagin access als DEP da lur pazientas e pazients. Ellas han dentant la pussaivladad da dumandar Voss documents da sanadad da Vossas medias e medis e da transferir quels en Voss DEP.
Las datas da sanadad èn spezialmain sensiblas; perquai è il DEP suttamess als pli auts standards da segirezza. L'elavuraziun da las datas è definida cleramain e limitada tras lescha.
Las persunas spezialisadas dal sectur da sanadad ch'èn autorisadas ston s'annunziar, avant ch'ellas prendan invista d'in DEP. Tut las activitads vegnan protocolladas; en il protocol d'access vesais Vus, tgi che ha consultà u arcunà documents.
La plattafurma d'infurmaziun uffiziala davart il DEP infurmescha detagliadamain davart tut ils aspects dal dossier electronic dal pazient.
La plattafurma cuntegna ina glista dals purschiders dal DEP certifitgads.
L'Uffizi federal da sanadad publica infurmescha detagliadamain davart il DEP e davart ses svilup.