Empustar documents da stadi civil

Nua che Vus stuais empustar ils documents da stadi civil, dependa dal gener da document che Vus duvrais.

Empustaziun tar l'uffizi da stadi civil dal lieu d'origin:

Persunas che n'han betg il dretg da burgais svizzer empostan quests documents tar l'uffizi da stadi civil da lur lieu da domicil u da dimora resp. tar l'uffizi da stadi civil da lur ultim lieu da domicil.

• Attest d'origin (per burgais svizzers): Quest document serva sco basa per laschar inscriver las datas persunalas en il register d'abitants dal lieu da domicil.
• Attest da stadi civil (per burgais svizzers): Quest document inditgescha las datas actualas davart il stadi civil, p.ex. il num ed il stadi civil.
• Conferma davart il stadi civil registrà (per burgais esters): Quest document inditgescha las datas actualas registradas davart il stadi civil, p.ex. il num ed il stadi civil.
• Certificat davart il stadi da famiglia registrà: Quest document infurmescha davart il stadi civil actual sco er davart tut ils uffants legitims ed illegitims d'ina persuna.
• Certificat da famiglia: Quest document attesta il lieu e la data da la maridaglia e cuntegna las datas persunalas actualas da la conjugala u dal conjugal e dals uffants cuminaivels. El vegn remplazzà en cas d'in nov eveniment da stadi civil (p.ex. naschientscha, mort, renconuschientscha d'in uffant).

Empustaziun tar l'uffizi da stadi civil dal lieu da la maridaglia resp. dal lieu da l'inscripziun:

• Attest da maridaglia: Quest document inditgescha il lieu e la data da la maridaglia civila, ils nums dals conjugals avant e suenter la maridaglia sco er lur lieus d'origin.
• Document da partenadi: Quest document inditgescha il lieu e la data da l'inscripziun dal partenadi registrà sco er ils nums ed ils lieus d'origin da las partenarias resp. dals partenaris avant e suenter l'inscripziun.

Empustaziun tar l'uffizi da stadi civil dal lieu da naschientscha:

• Attest da naschientscha: Quest document attesta la naschientscha d'in uffant. El inditgescha la data, il lieu e l'ura da la naschientscha sco er ils geniturs (nums, prenums, lieus d'origin, domicil).

Empustaziun tar l'uffizi da stadi civil dal lieu da renconuschientscha:

• Conferma da la renconuschientscha d'in uffant: Sch'il bab ha renconuschì in uffant cun vigur legala, po el empustar ina conferma da questa renconuschientscha. Quella serva a cumprovar la renconuschientscha succedida.

Empustaziun tar l'uffizi da stadi civil dal lieu da mort:

• Attest da mort: Quest document attesta la mort d'ina persuna ed inditgescha il lieu, la data e l'ura da la mort.