Per Voss uffants pudais Vus empustar in passaport e/u ina carta d’identitad a partir dal di da la naschientscha. I n’è betg pussaivel d'als laschar registrar en Voss document d’identitad.

Resguardai per plaschair: Sch’ils geniturs n’èn betg maridads, èsi pussaivel da nudar en il passaport d’in dals dus geniturs ch’ella u el haja il dretg da tgira.

Resguardai per plaschair:

• Vus pudais empustar in document d’identitad per Voss uffant mo, sche Vus avais il dretg da tgira.

• Sche tuts dus geniturs han il dretg da tgira, basta la suttascripziun d'in genitur per empustar in document d’identitad. Sch’ils geniturs n’èn percunter betg maridads, sch'els èn divorziads u na vivan betg ensemen, dovri in plainpudair suttascrit da l’auter genitur.

• A partir da 7 onns ston ils uffants suttascriver sezs lur documents d’identitad.

• Las improntas dals dets per il passaport biometric vegnan memorisadas pir a partir da 12 onns.

• A partir da 18 onns sto Vossa figlia u Voss figl empustar sez ses document d’identitad.

Las datas biometricas (fotografia da la fatscha, suttascripziun ed improntas dals dets) vegnan registradas da las autoritads chantunalas u da la represchentanza svizra a l’exteriur. Las datas biometricas vegnan memorisadas sin in chip ed èn uschia segiradas cunter in eventual abus.

La fotografia vegn fatga normalmain ensemen cun la registraziun da las ulteriuras datas biometricas. Intgins chantuns permettan er da prender cun sai ina fotografia sin ina clavetta USB.

Sche Vus empustais la carta d’identitad tar Vossa vischnanca da domicil, sto la fotografia che Vus prendais cun Vus correspunder exactamain a las prescripziuns.

Il passaport e la carta d’identitad da persunas creschidas èn valaivels 10 onns. Ils documents d’identitad d'uffants e da giuvenils fin 18 onns èn valaivels 5 onns.

Renovar il passaport e la carta d’identitad

I n’è betg pli pussaivel da renovar in passaport scadì u ina carta d’identitad scadida. Vus stuais empustar novs documents d’identitad e resguardar exactamain la procedura en quest connex.

Viagiar cun in document d’identitad valaivel u scadì

Per viagiar duvrais Vus normalmain in document d’identitad valaivel. As infurmai ad ura tar la represchentanza da Voss pajais da destinaziun en Svizra u tar la represchentanza svizra a l’exteriur davart las disposiziuns d’entrada en il pajais.

Intgins pajais, sco per exempel ils Stadis Unids da l’America, pretendan che Voss passaport saja valaivel anc almain sis mais suenter Vossa sortida dal pajais.

En auters pajais èsi dentant pussaivel da viagiar durant in tschert temp cun in document d’identitad ch'è scadì.

Per pudair entrar en intgins pajais, sco per exempel en ils Stadis Unids da l’America, en la China u en l’Australia, stuais Vus empustar in visum avant la partenza.

Passaport provisoric

En cas urgents giustifitgads pudais Vus empustar in passaport provisoric tar il post chantunal da passaports, tar l’ambassada svizra u tar il consulat svizzer dal pajais, nua che Vus As trategnais.

Resguardai per plaschair:

Il passaport provisoric n’è – cuntrari al passaport normal – betg in passaport biometric (che cuntegna in chip cun Vossas improntas dals dets e cun Vossa fotografia da la fatscha) e na vegn perquai betg acceptà en tut ils pajais: las represchentanzas estras en Svizra As infurmeschan davart las disposiziuns d’entrada dals singuls pajais.

Il passaport provisoric è valaivel mo per la durada da Voss viadi e maximalmain 12 mais.

Ils pretschs per documents d’identitad che vegnan emess a l’exteriur correspundan als pretschs en la tabella, midads en la valuta locala.

Sche Vus avais pers en Svizra u a l’exteriur il passaport u la carta d’identitad u sche Voss document d’identitad è vegnì engulà, stuais Vus proceder tenor las indicaziuns sin la pagina Perdita u engol dal passaport u da la carta d’identitad.

Sche Vus essas estra u ester e planisais d’empustar in passaport svizzer, stuais Vus suandar exactamain las indicaziuns che Vus chattais sin la pagina Natiralisaziun.