En in extract dal register penal svizzer ch’è destinà a persunas privatas (extract privat), èn enumeradas las sentenzias pervia da crims e da surpassaments durant in tschert temp, tut tenor il gener da la sancziun.
In tal extract pudais Vus pretender p.ex. d'in futur patrun da lavur u sche Vus vulais acquistar ina permissiun da purtar arma u il dretg da burgais svizzer.
Vus pudais empustar l’extract al spurtegl da la Posta u online sin la pagina d’internet da l’Uffizi federal da giustia.
Mintga extract custa 17 francs.
Sche Voss extract è destinà ad in’autoritad da l’exteriur u ad in post consular (p.ex. per in visum), stuais Vus pajar anc ina giada 20 francs per l’autentificaziun da l’extract.
Tge che Vus stuais far per in’autentificaziun da l’extract vegnis Vus a savair qua.
En in extract privat spezial dal register penal cumparan be condemnaziuns che scumondan a Vus il suandant:
pratitgar ina tscherta professiun u activitad,
vegnir en contact cun tschertas persunas u
entrar u bandunar in tschert territori.
I sa tracta da la protecziun da persunas minorennas u d'autras persunas cun in basegn da protecziun spezial.
In extract privat spezial pudais Vus be empustar sche Vus avais l’intenziun da pratitgar in’activitad organisada che cumpiglia il contact regular cun persunas minorennas u cun autras persunas cun in basegn da protecziun spezial (p.ex. trenader da sport, magistra).
Per empustar l’extract privat spezial vala il medem sco per l’extract privat. Dentant sto il post che vul far diever da Voss servetsch emplenir e suttascriver l’emprim la conferma dal patrun ed As trametter quella; en quella conferma Voss futur patrun ch’i dovra in extract privat spezial per questa plazza.
Ulteriuras infurmaziuns davart l’extract privat e davart l’extract privat spezial chattais Vus sin la pagina da FAQ da l’Uffizi federal da giustia.