Las autoritads svizras online

directamain tar il cuntegn

Divorzi e pajaments da mantegniment

Mantegniment tranter conjugals

Suenter il divorzi stuais Vus e Voss anteriur conjugal da princip procurar sezs per Voss mantegniment.

Criteris per in pajament da mantegniment

Tut tenor quant ditg che la lètg ha durà e co che Vus avais partì la lavur, tut tenor la vegliadetgna, la sanadad, la scolaziun professiunala, las perspectivas da gudogn e la capacitad finanziala dals conjugals po in conjugal – almain durant in tschert temp – avair il dretg da vegnir sustegnì finanzialmain tras l'auter conjugal.

Calculaziun dals pajaments da mantegniment

La dretgira decida quant auta che la renta da mantegniment duai esser. Decisivas èn las relaziuns finanzialas:

  • Paja dals conjugals: quant stat a disposiziun a mintgin (il minimum d'existenza dal conjugal che sto pajar il mantegniment resta dentant garantì)
  • Basegns finanzials: custs per l'abitaziun, per la cassa da malsauns, il mangiar, vestgadira  e.u.v. 

Ils conjugals u la dretgira elavuran ina cunvegna che sto vegnir examinada ed approvada dal derschader. 

Mantegniment dals uffants

Er suenter il divorzi èn ils geniturs obligads da procurar per il mantegniment da lur uffants. Quai almain fin a lur maiorennitad resp. fin ch'els han terminà lur emprima scolaziun ch'als permetta alura d'entrar en la vita professiunala.
Il mantegniment duai correspunder als basegns da l'uffant, uschia ch'i na dastga qua er betg vegnir intervegnì en il minimum d'existenza da la persuna che ha l'obligaziun da mantegniment. La dretgira fixescha quant aut ch'il pajament da mantegniment duai esser.
As infurmai tar in'autoritad giudiziala, tar ina advocata u in advocat davart la calculaziun dal mantegniment.

Circumstanzas da vita

  • Sche Voss uffant viva principalmain cun Vus, contribuis Vus en spezial cun l’educaziun al mantegniment da l’uffant.
  • Sche Voss uffant na viva betg ensemen cun Vus, stuais vus pajar aliments mensils, sche Vossa paja surpassa il minimum d’existenza. Tar la calculaziun dals aliments vegn resguardada la cumpart che Vus contribuis a la tgira da l’uffant.

Sch'il mantegniment na vegn betg pajà

Sch'il conjugal che sto pajar ils aliments n'ademplescha betg sia obligaziun, ha l'auter conjugal differentas pussaivladads:

  • Ils chantuns èn obligads da porscher in agid d'incasso gratuit per ils aliments d'uffants ed er da pajar quels anticipadamain sut tschertas premissas.
  • Sut tschertas premissas avais Vus la pussaivladad da pretender in'uschenumnada obligaziun da pajament tar la dretgira civila responsabla. Alura vegn l'aliment deducì directamain da la paja da Voss anteriur conjugal e pajà a Vus.
  • Per pajaments da mantegniment gia debitads pudais Vus introducir ina scussiun tar l'uffizi da scussiun al domicil dal conjugal che sto pajar il mantegniment.

Per chastiar il conjugal che sto pajar il mantegniment, ma che n'ademplescha betg sia obligaziun da pajament, malgrà ch'el fiss en cas da far quai, pudais Vus instradar ina procedura penala.

Agid d'incasso e pajament anticipà – contactar il post cumpetent

Obligaziun da pajament e procedura penala – infurmaziuns e contact cun la dretgira responsabla

Tut tenor il chantun èn las dretgiras organisadas differentamain. En cas da malsegirezzas As infurmai tar in'autoritad giudiziala chantunala u tar in advocat per vegnir a savair tge dretgira che Vus stuais contactar.

Inoltrar ina dumonda da scussiun – chattar l'uffizi da scussiun cumpetent

Decisiv è il domicil dal conjugal che sto pajar il mantegniment.

Infurmaziuns davart la revisiun dal dretg da mantegniment