Las autoritads svizras online

directamain tar il cuntegn

Disturbis da canera e vischinanza

Il dretg da locaziun na regla betg tut ils aspects da la convivenza tranter locataris, proprietaris u administraziuns d'immobiglias. Er las relaziuns tranter vischins na vegnan betg tematisadas detagliadamain en il dretg da locaziun.

Questas relaziuns vegnan definidas tras l'urden da chasa u er mo tras isanzas. L'autoritad cumpetenta variescha tut tenor il gener dal disturbi.

Canera:

  • Sche Vus vegnis mulestads da la canera da las vischinas e dals vischins, As pudais Vus drizzar a las autoritads localas da polizia. Sco ruaus da notg vala en blers lieus il temp tranter las 22.00 e las 6.00. Las dumengias ed ils firads, ma er ils lavurdis vala ultra da quai il temp da mezdi da las 12.00 fin las 13.00 sco temp da paus.
  • Sche Vus patis da la canera da la via u da la viafier, èsi er pussaivel da prender mesiras, sche tschertas valurs d'immissiun vegnan surpassadas. As drizzai en quest cas a Vossa vischnanca da domicil ubain directamain al chaschunader (chantun per las vias chantunalas, Confederaziun per las vias naziunalas, Viafier retica, Viafiers federalas, BLS p.ex. en cas da canera da la viafier e.u.v.).
  • Canera da construcziun: Cunter in project da construcziun da Voss vischin pudais Vus far protesta tar la vischnanca. Fitg savens vegnan disturbis chaschunads tras lavurs da construcziun sin ils bains immobigliars dals vischins (canera, puntanadas e.u.v.). Er sche quests disturbis èn effectivamain memia gronds, als ston ils vischins da princip tolerar e na pon betg pretender ch'i vegnian eliminads. Sche las lavurs da construcziun chaschunan dentant in donn, pon ins pretender ina indemnisaziun sut tschertas premissas.

Auters conflicts cun vischins sco p.ex. donns materials pon er vegnir avisads tar la polizia. Sche quai na fa nagin effect, pudais Vus purtar plant. Cun in tal plant pon violaziuns vegnir impedidas, eliminadas u restrenschidas ad ina mesira admissibla. Eventualmain po er vegnir dumandada ina indemnisaziun u ina reparaziun.

En cas da dispitas cun il vischin contactai l'autoritad da mediaziun ch'è responsabla per Vus.

Cussegliaziun ed infurmaziun

Autoritad chantunala da mediaziun (infurmaziuns, cussegliaziun, models)

associaziuns da locataris resp. da locaturs

Er las associaziuns da locataris resp. da locaturs sustegnan las dumondas ed ils interess dals locataris resp. dals locaturs en connex cun la desditga.

Tge pon ins far cunter disturbi da canera che sa repeta en ina chasa da locaziun?

Sch’il discurs cun ils vischins na gida nagut, pon ins pretender tar il fittadin cun ina brev che la canera smettia entaifer in termin adattà. Sche quai n’è betg il cas, pudais Vus far a savair che Vus na vegnis betg a transferir il tschains en avegnir, mabain mo al deponer. Per il temp da disturbi da canera pudais Vus pretender ina reducziun dal tschains da locaziun.

Sch’il fittadin na resguarda betg la supplica malgrà l’admoniziun per scrit dal locutur, po quel scursanir il termin da desditga sin mo 30 dis per la fin dal mais.