Las autoritads svizras online

directamain tar il cuntegn

Entrar en Svizra cun animals e cun plantas

Import d'animals cumprads a l'exteriur

Per animals cumprads a l'exteriur che vegnan importads en Svizra na ston ins betg pajar dazi, dentant la taglia sin la plivalur. Resguardai per plaschair ils ulteriurs puncts sin la pagina d'internet da l'Administraziun federala da duana.

Transit d’animals e da products d’origin animal

Per il transit d’animals, da products d’origin animal, da victualias ch’èn betg d’origin animal u d’objects da diever valan differentas disposiziuns. Quellas varieschan er sin basa dal pajais d’origin e da destinaziun, tut tenor sch’i sa tracta da la UE u da terzs stadis.

Entrar en Svizra cun animals da chasa

Entrais Vus cun Voss chaun u cun Voss giat da l'exteriur en Svizra? Tut tenor la ristga da frenesia (ravgia da chauns) en il pajais da partenza datti prescripziuns differentas. Ulteriuras infurmaziuns inclusiv in pratic agid online chattais Vus sin la pagina d'internet da l'Uffizi federal veterinar.

Import da plantas

Svelt han ins cumprà plantas sco souvenir da vacanzas. Ins sto dentant esser precaut e resguardar las restricziuns ed ils scumonds d'import.

Surpassa la valur da las plantas cumpradas a l'exteriur l'import liber da 300 francs? Alura ston las plantas che vegnan importadas vegnir annunziadas a la duana svizra. Sin la pagina d'internet da l'Administraziun federala da duana chattais Vus indicaziuns pli exactas.

Import da spezias d’animals e da plantas protegidas

Per importar animals, plantas e products protegids da la CITES è en general necessaria ina permissiun d’export CITES emessa da l’autoritad executiva CITES dal pajais d’origin. Medemamain è necessaria ina permissiun d’import da l’Uffizi federal da segirezza alimentara e fatgs veterinaris (USAV).