Las autoritads svizras online

directamain tar il cuntegn

Desditga da la relaziun da lavur

Sche la relaziun tranter il patrun e la persuna emploiada n'è betg reglada tras in contract limità, pon tuttas duas partidas desdir da tut temp il contract. Per far quai ston ellas dentant observar in tschert termin da desditga.

Cuntegn da la brev da desditga

Sch'il contract da lavur na cuntegna naginas autras regulaziuns, po ina desditga vegnir pronunziada a bucca. Per motivs da cumprova èsi dentant meglier d'inoltrar la desditga en scrit e sco brev recumandada. Sche Vus surdais persunalmain la desditga, laschai confermar il patrun sin ina copia ch'el haja survegnì la desditga.

L'effect d'ina desditga cumenza pir, cur ch'ella è arrivada tar il patrun. Ella sto pia arrivar tar Voss patrun il pli tard l'ultim di da lavur dal mais.

La brev da desditga sto cuntegnair ils suandants puncts:

  • indicaziuns correctas da la persuna emploiada e dal patrun (num, adressa). Vus stuais procurar che la desditga arrivia tar il patrun, vul dir tar la partiziun da persunal u tar Voss superiur direct
  • indicaziun dal contract da lavur che vegn desditg (contract da lavur dals ...)
  • indicaziun da la data, per la quala la desditga duai valair (per il solit per la fin d'in mais, observar il termin da desditga)
  • la brev da desditga duess esser suttascritta e cuntegnair la data

Igl è facultativ d’inditgar in motiv per la desditga.

Chargiar giu in model d'ina desditga
Format:
MS Word
Grondezza:
11 kb
Actualisà:

Termins da desditga

Guardai ch'il termin da desditga saja vegnì observà tenor il contract da lavur. Sch'il contract da lavur n'è betg vegnì fatg en scrit e sch'i n'exista betg in contract collectiv da lavur, sa drizza il termin da desditga tenor il Dretg d'obligaziuns (DO). El importa:

  • 7 dis durant il temp d'emprova (per la fin dad x-in di)
  • 1 mais durant l'emprim onn da servetsch (per la fin d'in mais)
  • 2 mais dal segund fin il novavel onn da servetsch (per la fin d'in mais)
  • 3 mais a partir dal dieschavel onn da servetsch (per la fin d'in mais)
  • Contracts da lavur limitads fineschan il di fixà. I n'è betg pussaivel da desdir la relaziun da lavur limitada avant la fin da la durada fixada, nun ch'il contract prevesia da terminar pli baud la relaziun da lavur u nun ch'i sajan avant maun motivs impurtants.

Ina protecziun cunter ina desditga da vart dal patrun exista durant il servetsch militar e civil, durant la protecziun civila sco er en cas da malsogna, d'accident e da gravidanza. Ils lavurants pon inoltrar la desditga er durant quests eveniments.