Las autoritads svizras online

directamain tar il cuntegn

Desditga dal contract da locaziun tras il locatur

Tant ils locataris sco er ils locaturs pon desdir in contract da locaziun. En quest connex ston vegnir observads ils termins da desditga legals ubain fixads en il contract. La lescha protegia ils locataris cunter ina desditga abusiva. Plinavant ston ils locaturs observar tschertas furmas da desditga e motivar la desditga sin giavisch dals locataris.

Il locatur sto communitgar als locataris la desditga cun in formular approvà dal chantun. En quest connex ston vegnir observads ils termins ch'èn fixads en la lescha u en il contract. Per abitaziuns importa il termin da desditga almain trais mais.

Il locatari ha il dretg da vegnir a savair il motiv da la desditga. Desditgas che cuntrafan a la buna fai (p.ex. ina desditga per motiv ch'il locatari fa valair ses dretgs da locatari; ina desditga per motiv che las relaziuns famigliaras dal locatari sa midan) pon vegnir contestadas tar l'autoritad da mediaziun. Il formular da desditga approvà uffizialmain cuntegna las infurmaziuns necessarias davart il proceder ch'il locatari sto instradar per contestar la desditga.

Sch'ina desditga ha per consequenza ina situaziun precara per ils locataris (problems finanzials u famigliars, mancanza d'abitaziuns), poi vegnir dumandà tar l'autoritad da mediaziun da prolungar la relaziun da locaziun.

Da princip ha in sutlocatari la medema protecziun cunter la desditga sco tut ils locataris. Sch'il proprietari desdi al locatari principal, po mo quest ultim contestar la desditga sco abusiva.

Cussegliaziun ed infurmaziun

Autoritad chantunala da mediaziun (infurmaziuns, cussegliaziun, models)

L'autoritad da mediaziun infurmescha e cusseglia tant ils locataris sco er ils locaturs. Tar l'autoritad da mediaziun pon vegnir retratgs ils formulars necessaris.

Associaziuns da locataris resp. da locaturs

Er las associaziuns da locataris resp. da locaturs sustegnan las dumondas ed ils interess dals locataris resp. dals locaturs en connex cun la desditga.