Las autoritads svizras online

directamain tar il cuntegn

Desditga dal contract da locaziun tras il locatari

In locatari po desdir in contract da locaziun illimità sin in tschert termin da desditga. En quest connex ston però vegnir resguardads ils termins da desditga legals u fixads en il contract.

Desditga entaifer il termin

Locataris che vulan bandunar lur abitaziun ston desdir en scrit – il meglier cun ina brev recumandada – lur contract da locaziun entaifer il termin. Sch'els èn maridads u sch'els vivan en in partenadi registrà vala la desditga mo, sch'ella è suttascritta da tuts dus partenaris. Il termin da desditga per abitaziuns importa per regla trais mais. Ins sto far attenziun che la desditga arrivia a temp tar il locatur (in di avant il termin da desditga). Ils termins da desditga èn fixads en il contract da locaziun, uschiglio valan ils termins d'usit local. Quels survegn ins tar las autoritads da mediaziun.

Model d'ina brev da desditga

Desditga dal contract da locaziun ultimamain suttascrit

Uschè spert che Vus avais suttascrit in contract da locaziun, valan ils termins da desditga fixads en il contract. Suttascrivai pir lura, sche Vus avais definitivamain interess per l’immobiglia. La presumziun currenta, ch’ins possia sa retrair entaifer 5 dis dal contract suttascrit, na constat betg.

Desditga anticipada (ordaifer il termin, cun in locatari substitutiv)

Sche Vus vulais bandunar anticipadamain l'abitaziun e sche Vus vulais evitar da stuair pajar il tschains da locaziun fin ch'il contract è terminà, stuais Vus proponer in nov locatari ch'è acceptabel per il locatur: Il nov locatari sto esser solvent e sto esser pront da surpigliar il contract da locaziun per las medemas cundiziuns. Il locatur ha temp fin 30 dis per examinar, sch'il locatari substitutiv è en cas dad ademplir il contract da locaziun e da pajar il tschains da locaziun.

Model d'ina brev per ina desditga anticipada

Cussegliaziun ed infurmaziun

Autoritad chantunala da mediaziun (infurmaziuns, cussegliaziun, models)

L'autoritad da mediaziun infurmescha e cusseglia tant ils locataris sco er ils locaturs. Tar l'autoritad da mediaziun pon vegnir retratgs ils formulars necessaris.

Associaziuns da locataris resp. da locaturs

Er las associaziuns da locataris resp. da locaturs sustegnan las dumondas ed ils interess dals locataris resp. dals locaturs en connex cun la desditga