Las autoritads svizras online

directamain tar il cuntegn

Denunziar insatgi tar la polizia – purtar plant

Denunziar in malfatg a la polizia

Suenter in malfatg stuessas Vus da princip infurmar la polizia ubain la procura publica uschè svelt sco pussaivel, ma Vus n'essas betg obligà da far quai. Mintga post da polizia prenda encunter ina denunzia penala a bucca u en scrit.

Posts da polizia

Co vegnan persequitads ils malfatgs?

Gener dal malfatg Persecuziun penala
Delict che vegn persequità d'uffizi

In delict che vegn persequità d'uffizi è in grev delict, p.ex. enguladitsch, incendi intenziunà, constricziun sexuala u greva blessura corporala.
  • Il delict vegn persequità da las autoritads penalas (polizia e/u procura publica), er sche la persuna donnegiada na fa nagina denunzia penala.
  • La premissa è che l'autoritad sa dal delict. Mintga persuna po far ina denunzia penala tar la polizia, er sch'ella n'è betg pertutgada persunalmain dal delict.
Delict che vegn persequità sin plant

In delict che vegn persequità sin plant è savens in delict pli lev ch'il delict che vegn persequità d'uffizi, p.ex. donn material, pitschen enguladitsch u leva blessura corporala.
  • La persuna donnegiada sto far in uschenumnà plant penal tar la polizia.
  • Senza plant penal na vegn il delict betg persequità.

Il plant penal – bun da savair

  • In plant penal pudais Vus inoltrar mo, sche Vus sez essas vegni blessà tras il delict. Sche Vus essas inabel d’agir, po far quai Voss represchentant legal.
  • Per purtar il plant penal avais Vus temp trais mais a partir da quel mument, ch’il delinquent è enconuschent a la persuna donnegiada.
  • Vus pudais purtar il plant penal cunter ina persuna enconuschenta u cunter ina persuna nunenconuschenta.
  • Vus pudais er puspè revocar il plant penal. Faschai però stim: Sch'in delict As ha chaschunà in donn che Vus vulais far valair en il rom da la procedura penala (e che n'è p.ex. betg cuvrì da l'assicuranza), stuais Vus far in plant penal.
  • Vus na stuais betg engaschar in advocat. En cas cumplitgads èsi dentant raschunaivel da sa laschar cussegliar.
  • Plants penals pon vegnir fatgs tar in post da polizia (a bucca u en scrit) u tar la procura publica (en scrit). 

La denunzia penala – bun da savair

  • Ina denunzia penala po far mintga persuna che ha enconuschientscha d'in delict. I n’è betg relevant, sch'ella è pertutgada sezza dal delict u betg.
  • Vus pudais far la denunzia penala cunter ina persuna enconuschenta u cunter ina persuna nunenconuschenta.
  • Denunzias penalas pon vegnir fatgas tar in post da polizia u tar la procura publica a bucca u en scrit.

Andament da la procedura penala

Dapi l'onn 2011 vegnan delicts persequitads en tut ils chantuns tenor la medema moda e maniera.

  • La polizia eruescha, tge ch'è capità. Sch'i dat avunda cumprovas e meds da cumprova per ch'ina procedura penala possia vegnir cuntinuada, decida la procura publica, ch'è responsabla per l'inquisiziun penala, a la fin da las retschertgas.
  • Sch'il delict vegn davant dretgira, represchenta la procura publica l'accusaziun. La persuna inculpada po sa defender da tut temp. Il derschader al taidla, lascha eventualmain far expertisas supplementaras e tira a la fin la sentenzia.
  • Da princip pudais Vus contestar la sentenzia cun far in'appellaziun u in recurs. Igl è recumandabel da sa laschar cussegliar d'ina persuna dal fatg.
  • Tgi che ha fatg ina denunzia penala, po s'infurmar tar las autoritads, sch'ina procedura è vegnida iniziada sin la denunzia u betg