directamain tar il cuntegn

Tgi ha il dretg da votar?

Tut las Svizras maiorennas e tut ils Svizzers maiorens dastgan votar ed eleger. Tscherts chantuns dattan il dretg da votar e d'eleger ad ulteriuras persunas.

Dretg da votar sin plaun federal

Sche Vus avais almain 18 onns ed il dretg da burgais svizzer e sche Vus na stais betg sut curatella cumplessiva pervia d'ina malsogna u d'ina inabilitad permanenta da giuditgar, pudais Vus As participar a las votaziuns federalas ed a las elecziuns dal Cussegl naziunal. Sut questas premissas pudais Vus er far e suttascriver sin plaun federal in referendum u ina iniziativa.

Votar per l'emprima giada

Vus na stuais As laschar registrar nagliur per participar a las votaziuns federalas. Vus vegnis inscrits d'uffizi en il register electoral da Vossa vischnanca da domicil, uschespert che Vus ademplis las premissas dal dretg da votar. Svizras e Svizzers a l'exteriur percunter ston s'annunziar tar la represchentanza svizra ch'è responsabla per els.

Dretg da votar per Svizras e Svizzers a l'exteriur

Svizras e Svizzers a l'exteriur pon sa participar a las votaziuns ed a las elecziuns naziunalas. En tscherts chantuns pon els er sa participar a las votaziuns ed elecziuns chantunalas.

Dretg da votar per Svizras e Svizzers a l'exteriur

Dretg da votar per burgaisas e burgais dubels

Ma tge, sch'ina persuna è burgaisa da la Svizra e d'in ulteriur stadi? La naziunalitad dubla n'ha naginas consequenzas per il dretg da votar. Sch'i n'èn betg avant maun auters motivs d'impediment, dastgan las persunas pertutgadas pia votar ed eleger.

Dretg da votar per persunas minorennas mo en Glaruna

Sin plaun federal han mo persunas maiorenas il dretg da votar e d'eleger. Sin plaun chantunal po dentant mintga chantun concluder, sch'el vul dar a persunas minorennas il dretg da votar u betg. Davart projects chantunals e communals dastgan fin ussa votar giuvenils da 16 e da 17 onns mo en il chantun Glaruna. Candidar per uffizis politics dastgan però er Glarunaisas e Glarunais pir cun 18 onns.

Dretg da votar da persunas estras

Persunas estras na pon sa participar ni a votaziuns federalas ni ad elecziuns dal Cussegl naziunal. Nua ch'il dretg chantunal prevesa quai, pon ellas dentant prender part a votaziuns chantunalas e/u communalas.

Dretg da votar da persunas estras en Svizra