directamain tar il cuntegn

Tgi ha il dretg da votar e d'eleger?

En Svizra pon tut las Svizras ed ils Svizzers maiorens – inclusiv las Svizras ed ils Svizzers a l'exteriur – votar ed eleger sin plaun federal. Er intgins chantuns ed intginas vischnancas concedan quests dretgs sin plaun chantunal e communal a las Svizras ed als Svizzers a l'exteriur ed en cas particulars schizunt a las persunas estras. Tut las infurmaziuns davart il dretg da votar e d'eleger en Svizra, che valan er per las elecziuns dal parlament dals 20 d'october 2019, chattais Vus qua.

Dretg da votar e d'eleger

Sche Vus avais almain 18 onns, essas burgaisa u burgais svizzer, abitais en Svizra e na stais betg sut curatella cumplessiva pervia d'ina inabilitad permanenta da giuditgar (u na vegnis betg represchentada resp. represchentà tras ina persuna incumbensada da prevenziun), pudais Vus As participar a las votaziuns ed a las elecziuns federalas, chantunalas e communalas. Sut questas premissas pudais Vus er inoltrar e suttascriver in referendum u ina iniziativa dal pievel.

Votar per l'emprima giada

Per pudair As participar per l'emprima giada a las votaziuns ed a las elecziuns federalas na stuais Vus As laschar registrar nagliur. Vus vegnis numnadamain inscritta u inscrit d'uffizi en il register electoral da Vossa vischnanca da domicil, uschespert che Vus ademplis las premissas dal dretg da votar.

Dretg da votar e d'eleger da las Svizras e dals Svizzers a l'exteriur

Las Svizras ed ils Svizzers a l'exteriur pon sa participar a las votaziuns ed a las elecziuns naziunalas (sco p.ex. a las elecziuns dal Cussegl naziunal). Per quest intent ston els s'annunziar en mintga cas tar la represchentanza svizra cumpetenta a l'exteriur. Ultra da quai ston els sa laschar inscriver en il register electoral da lur ultima vischnanca da domicil u – sch'els n'han mai vivì en Svizra – da lur vischnanca burgaisa.

Dretg da votar e d'eleger da las Svizras e dals Svizzers a l'exteriur: infurmaziuns e formulars
Represchentanzas svizras a l'exteriur

En tscherts chantuns pon las Svizras ed ils Svizzers a l'exteriur plinavant sa participar a las votaziuns ed a las elecziuns chantunalas communalas, per exempel a las elecziuns dal Cussegl dals chantuns (chombra parlamentara che represchenta ils chantuns). Per infurmaziuns davart il dretg da votar e d'eleger da las Svizras e dals Svizzers a l'exteriur sin plaun chantunal e communal As drizzai per plaschair a l'autoritad cumpetenta da Voss chantun.

Infurmaziuns detagliadas davart ils dretgs politics da las Svizras e dals Svizzers a l'exteriur sin plaun chantunal e communal

Las Svizras ed ils Svizzers a l'exteriur e las elecziuns dal Cussegl dals chantuns 2019

Infurmaziuns specificas detagliadas dals chantuns davart la pussaivladad da sa participar ils 20 d'october 2019 a las elecziuns dal Cussegl dals chantuns chattan las Svizras ed ils Svizzers a l'exteriur sur la charta qua sutvart.

Karte der Schweizer Kantone

Dretg da votar e d'eleger da burgaisas dublas e da burgais dubels

La naziunalitad dubla n'ha naginas consequenzas per il dretg da votar e d'eleger. Sch'i n'èn betg avant maun auters motivs d'impediment, pon las persunas pertutgadas pia votar ed eleger.

Dretg da votar e d'eleger per persunas minorennas mo en il chantun Glaruna

Sin plaun federal han mo persunas maiorennas il dretg da votar e d'eleger. Sin plaun chantunal po percunter mintga chantun decider sez, sche persunas minorennas duain avair il dretg da votar e d'eleger u betg. Per il mument pon giuvenils da 16 e 17 onns votar mo en il chantun Glaruna davart projects chantunals e communals. Candidar per uffizis politics pon però er Glarunaisas e Glarunais pir a partir da 18 onns.

Dretg da votar e d'eleger da persunas estras

Persunas estras na pon sa participar ni a votaziuns ni ad elecziuns sin plaun federal. Nua ch'il dretg chantunal u communal prevesa quai, pon ellas dentant prender part a votaziuns chantunalas u a votaziuns ed ad elecziuns communalas. Per survegnir quest dretg, vegn savens premessa ina durada minimala dal domicil en il chantun u en la vischnanca. Sin plaun chantunal enconuschan ils chantuns Giura e Neuchâtel il dretg da votar (betg dentant il dretg d'eleger) per persunas estras.

Dretgs politics da persunas estras en Svizra sin plaun chantunal e communal (datas da l'Uffizi federal da statistica)
Dretgs politics da persunas estras en il chantun Neuchâtel
Dretgs politics da persunas estras en il chantun Giura