directamain tar il cuntegn

Entrada en uffizi da las parlamentarias e dals parlamentaris

Parlamentaria u parlamentari nov elegì? Cura e nua ha lieu l'entrada en uffizi? Nua survegn ins sustegn ed infurmaziuns? Co emprendan ins l'artisanadi d'ina parlamentaria u d'in parlamentari?

Cura entran las persunas nov elegidas en uffizi?

Las persunas nov elegidas entran per ordinari en uffizi en la sessiun che suonda lur elecziun. Lur mandat dura 4 onns e sa prolunghescha en cas d'ina reelecziun suenter ina nova candidatura.

Cussegl naziunal

Sch'ina commembra u in commember dal Cussegl naziunal sa retira durant quests 4 onns (legislatura), è la successiun reglada sco suonda:

  • En ils chantuns cun dapli ch'ina represchentanta u in represchentant en il Cussegl naziunal entra la successura u il successur en uffizi en la proxima sessiun.
  • En ils chantuns cun mo ina represchentanta u mo in represchentant en il Cussegl naziunal ha lieu ina nova elecziun chantunala per reglar la successiun.

Cussegl dals chantuns

Sch'ina commembra u in commember dal Cussegl dals chantuns sa retira, ha lieu en il chantun correspundent ina nova elecziun per reglar la successiun.

Sarament / empermischun da las parlamentarias e dals parlamentaris

Per entrar uffizialmain en uffizi ston las represchentantas ed ils represchentants ch'èn vegnids elegids en ina da las duas Chombras federalas, l'emprim prestar in sarament u in'empermischun. Mintga parlamentaria e parlamentari po tscherner libramain ina da las duas pussaivladads. Las parlamentarias ed ils parlamentaris prestan il sarament u l'empermischun l'emprim di da la sessiun da las Chombras federalas suenter l'elecziun. Sch'ina commembra u in commember dal Cussegl naziunal sa retira durant la legislatura, presta la successura u il successur il sarament u l'empermischun, cur ch'ella u el entra en uffizi.

Commembras e commembers dal Cussegl dals chantuns che vegnan reelegids senza interrupziun da lur mandat, na ston betg anc ina giada prestar il sarament u l'empermischun. Las commembras ed ils commembers dal Cussegl naziunal ston percunter prestar danovamain il sarament u l'empermischun al cumenzament da mintga nova legislatura.

  • L'empermischun sa cloma: «Jau empermet d'observar la Constituziun e las leschas e d'ademplir conscienziusamain las obligaziuns da mes uffizi.»
  • Il sarament sa cloma: «Jau engir davant Dieu il Tutpussant d'observar la Constituziun e las leschas e d'ademplir conscienziusamain las obligaziuns da mes uffizi.»

Tgi che refusa da prestar il sarament u l'empermischun solenna, desista da ses uffizi.

Sustegn da las parlamentarias e dals parlamentaris

Durant lur entira durada d'uffizi pon las parlamentarias ed ils parlamentaris recurrer al sustegn dals Servetschs dal parlament. Quels als distgargian cunzunt en fatgs administrativs.

Tge fan ils Servetschs dal parlament?
Ils Servetschs dal parlament

Incumbensas dal parlament

Las duas chombras dal parlament han las medemas incumbensas. Per exempel la legislaziun.

Las incumbensas dal parlament svizzer
Las leschas en Svizra ed il dretg internaziunal